इटहरी । राष्ट्रिय खेलकुद प्रतियोगिताअन्तर्गत प्रदेशस्तरीय प्रतियोगिता नजिकिँदै गएपछि इटहरी रङ्गशालामा तयारी सुरु गरिएको छ । नेपाली खेलकुद क्षेत्रको सबैभन्दा ठूलो महोत्सव राष्ट्रिय खेलकुद प्रतियोगिताअन्तर्गत सुनसरीको इटहरीमा रहेको रङ्गशालामा प्रदेशस्तरीय प्रतियोगिता आयोजना गरिने भएको हो ।
राष्ट्रिय खेलकुद परिषद्को स्वामित्वमा रहेको इटहरी रङ्गशालामा प्रतियोगिता हुने भएपछि घाँस हटाउने तथा रङ्गशालाको मर्मतसम्भारलगायतका काम सुरु गरिएको छ ।
नवौँ राष्ट्रिय खेलकुद प्रतियोगिता आगामी असोज २८ गतेदेखि कात्तिक ३ गतेसम्ममा गण्डकी प्रदेशमा आयोजना हुँदैछ । प्रतियोगिताअन्तर्गत सुनसरीको इटहरी रङ्गशालामा प्रदेशस्तरीय प्रतियोगिताको यही भदौ २४ गते उद्घाटन हुँदैछ । प्रदेशस्तरीय प्रतियोगिताको उद्घाटनसहित धेरै खेलकुद प्रतियोगिता आयोजना हुने इटहरी रङ्गशालामा सरसफाइदेखि अन्य तयारीका काम गर्न थालिएको जिल्ला खेलकुद विकास समिति सुनसरीका पूर्वाध्यक्ष अनुरोध थापाले बताउनुभयो ।
इटहरीमा मात्र नभई प्रदेश १ का अन्य स्थानमा रहेको रङ्गशालामा पनि राष्ट्रिय प्रतियोगिताअन्तर्गत प्रदेशस्तरीय खेलकुद प्रतियोगिता आयोजना हुने भएकाले मर्मतको काम सुरु गरिएको प्रदेश खेलकुद विकास बोर्डका सदस्य शैलेशकुमार विष्टले जानकारी दिनुभयो । इटहरी रङ्गशालामा सातौँ राष्ट्रिय खेलकुद प्रतियोगिताका धेरै खेलको प्रतिस्पर्धा आयोजना गरिएको थियो । रासस
