नामिबियामा (बिहीबार)देखि सुरु आईसीसी विश्वकप लिग–२ अन्तर्गतको त्रिदेशीय शृंखलामा नेपालले आज पहिलो खेल खेल्दै छ । नेपालले घरेलु टोली नामिबियाको सामना गर्न लागेको हो ।
नेपाल र नामिबियाबीचको खेल वाइन्डरस क्रिकेट मैदानमा नेपाली समयानुसार दिउँसो १ः१५ देखि सुरु हुनेछ । शृंखलामा नेपाल, नामिबिया र स्कटल्यान्ड छन् ।नेपाल र नामिबियाबीच अहिलेसम्म दुई एकदिवसीय अन्तर्राष्ट्रिय खेल भएको छ । ती दुवै खेल नामिबियाले जितेको थियो ।
६ टोली सहभागी विश्वकप लिग–२ मा नेपाल २० खेलबाट १७ अंकसहित छैटौँ स्थानमा छ । नामिबिया २७ खेलबाट २७ अंकका साथ चौथो स्थानमा छ ।नामिबिया पहिलो खेलमा स्कटल्यान्डसँग पराजित भएको थियो । नेपाल जितसहित शृंखलाको सुरुआत गर्न चाहन्छ ।
