काठमाडौँ । क्रिस्टियानो रोनाल्डो र लिओनेल मेस्सी,नेयमार र एमबाप्पे सम्मिलित क्लबबीचआज मैत्रीपूर्ण खेल हुँदैछ ।
फ्रान्सेली क्लब पेरिस सेन्ट जर्मेइन (पीएसजी) र साउदी अल स्टार–११ बीच खेल नेपाली समयअनुसार रातको १०:४५ बजे खेल हुनेछ । उक्त खेल रियादस्थित किंग फाहद रंगशालामा हुनेछ ।
पछिल्लो पटक मेस्सी र रोनाल्डोको भेट सन् २०२० डिसेम्बरमा भएको थियो । च्याम्पियन्स लिगमा बार्सिलोना र युभेन्ट्सबाट खेलेपछि दुवैले क्लब परिवर्तन गरेका छन् । मेस्सी बार्सिलोना छोडेर पिएसजी आइपुगेका छन् । त्यस्तै रोनाल्डो युभेन्टस छोडेर म्यानचेस्टर युनाइटेड हुँदै यसै महिना मात्र अल नासरमा अनुबन्धित भएका थिए । रोनाल्डोले डेब्यु गर्न भने बाँकी छ ।
रोनाल्डोले इंग्ल्यान्डमा रहँदा पाएको दुई खेलको प्रतिबन्ध पूरा नगरेका कारण अल नासरमा डेब्युका लागि प्रतीक्षा गर्नुपरेको हो । त्यसैले साउदी आएपछि उनले क्लबभन्दा अघि अल स्टारको कप्तानी गर्ने भएका छन् । त्यस्तै लिओनेल मेस्सी पनि पिएसजीको टोलीमा खेल्ने सम्भावना छ ।
मेस्सीले विश्वकप जितेपछि जनवरी ४ मा प्रशिक्षण गरिसकेका छन् । उनले त्यसयता पिएसजीका लागि लगातार खेल्दै आएका छन् । नेयमार र एमबाप्पे पनि खेलमा सहभागी हुने देखिन्छ ।
