विराटनगर । विराटनगर रंगेली रोडस्थित राजश्री सेविंग्स एण्ड क्रेडिट को–आँपरेटिभ सोसाइटी लि. सेवा कार्यालय विरुद्ध सेवाग्राहीले उजुरी दर्ता गरेका छन् । सुनसरीको दुहबी–९ का फिरोज आलमले किर्ते जाँलसाँझ गरेर ठगी गरेकोले अनुसन्धान गरेर कारवाही माग गर्दै जिल्ला प्रशासन कार्यालय मोरङमा उजुरी दिएका हुन् ।
एकजनाको धितोमा अर्को व्यक्तिलाई ऋण जारी गरिएको आरोप छ । निरक्षर ऋणीलाई दुईवटा चेकमा औंठा छाप लगाउन लगाएर अर्कोको नाममा पैसा ट्रान्सफर गराएको खुलेपछि सेवाग्राहीले कारवाहीको माग गर्दै उजुरी दिएका छन् ।
बिहीबार जिल्ला प्रशासन कार्यालयमा उजुरी दर्ता गरेपछि जिल्ला प्रहरी कार्यालयलाई आवश्यक अनुसन्धान गरेर कारवाही अगाडी बढाउन परिपत्र गरिएको छ । २०७५ सालमा सुनसरीको दुहबी नगरपालिका–९ छाताबेलीकी दुखनी खातुनको चेकमा औंठा छापा गराएर अर्को व्यक्तिको नाममा पैसा जारी गरेको खुलेको हो । त्यस्तै घटना पुनः दोस्रो पटक उहि व्यक्तिमाथि गरेपछि मात्रै सहकारीका सञ्चालकले बद्मासी गरेको बाहिर आएको हो ।
https://ourbiratnagar.net/2024/07/266925
दुखनीका चारजना छोराहरु मो.फिरोज आलम, मो.मोजाइल मियाँ, अप्रोज मियाँ र रोजित आलम जमिनका हकदार हुन् । दुखनीको नाममा अढाई कठ्ठा जग्गा छ । २०७५ सालमा २ लाख ५० हजार रुपैँया ऋण चाहिएपछि जग्गा धितो राखिएको थियो । तर, दुखनी देवीको नाममा दुईवटा चेक बनाएर औंठा छाप गराएर अर्को व्यक्तिलाई ७ लाख ५० हजार रुपँैया दिइएको पाइएको थियो ।
सहकारीले खडा गरेको व्यक्तिमार्फत पैसा निकासा प्रक्रिया मिलाएपछि पैसा बुझ्ने व्यक्ति फरार भएका थिए । सुनसरीका मधुवनका इन्द्रनारायण मण्डल भन्ने व्यक्ति भने सहकारीमै ऋणी खोजेर ल्याउने बिचौलियाको भूमिकामा रहेको आरोप छ । मण्डल सहकारीका सञ्चालक बैजनाथ साहका खास मान्छे थिए ।
दुखनीको नामको जग्गा धितोमा इन्द्रनारायण मण्डलले पैसा लगेका उनलाई पाँचवर्ष पक्राउ गरिएको थियो । पक्राउ गरेपछि उनले खातुन परिवारलाई फल्ड गरेको भन्दै सबै पैसाको साँवा ब्याज २०८० असारमा भुक्तानी गरेका थिए । मण्डलले दशलाख ऋणको २३ लाख ५२ हजार ८८९ रुपैँया भुक्तानी गरे । दुखनीको नाममा भएको ऋण र शेयरको चुक्ता भएको भौचर राजश्रीले दिएको थियो ।
तर, पुनः २०८० असार १८ गते दुखनीको छोरा मो.मोजाइललाई ऋण नसकिएको भन्दै सहकारीले ३ लाख ७५ हजार जम्मा गर्न लगाएको थियो । मोजाइलले ३ लाख ७५ हजार जम्मा गरेपछि असार २६ गते पुरानो ऋणलाई नयाँ बनाउने भन्दै दशलाख रुपेँयाको कागजात तयार पारिएको थियो । दशलाखको कागजातका आधारमा सेवा शुल्क कटाएर ९ लाख ४४ हजार रुपैँया बिष्णकुमार शर्माको नाममा जम्मा गरिएको थियो । असार १८ गते जम्मा गरिएको ३ लाख ७५ हजार समेत उनैलाई असार २७ गते ट्रान्सफर भएको देखिन्छ । तर, यी दुवै पैसा ट्रान्सफरमा सम्बन्धित व्यक्तिको सहीछाप छैन । सहकारीले ठगी गरेको जानकारी भएपछि पीडित परिवारले २२ दिनसम्म धाएर यसको कागजपत्र लिएका थिए । कागजपत्र लिएपछि थाहा भयो चिन्दै नचिनेका व्यक्तिलाई पैसा पठाएर आफ्नो टाउको ऋण थोपरिदैं आएको थियो ।
