विराटनगर । विराटनगर महानगरपालिका– १५ रानीका विजय चौधरीले लामो समय अरुको गार्मेन्ट उद्योगमा काम गरे । आर्थिक अवस्था कमजोर भएका कारण १५ वर्ष अरुको उद्योगमा मजदुरी गरेका उनी एक वर्षयता आफ्नै काम गर्छन् । अरुलाई पनि रोजगारी दिएका छन् ।
गार्मेन्ट उद्योगमा काम गर्दा उनले मासिक १५ देखि २० हजार रुपैयाँ आम्दानी गर्थे । थोरै आम्दानी र बढ्दो महंगीका कारण परिवारको खर्च दुःखले चलेको थियो । आफ्नो उद्योग सुरु गरेपछि सबै खर्च कटाएर उनी मासिक ४० हजार हाराहारी आम्दानी गर्न गर्छन् । बचत पनि गर्छन् ।
डेढ दशकयता गार्मेन्ट उद्योगमा मजदुरी गर्दा विजयलाई आफ्नै उद्योग सञ्चालन गर्ने रहर थियो । तर, उद्योगमा लगानी गर्ने पैसा थिएन् । जीवन विकास लघुवित्त वित्तीय संस्थाले ऋण सहयोग गरेपछि उनले आफ्नै गार्मेन्ट उद्योग सुरु गरेका हुन् । उद्योग सुरु गरेपछि उनको आर्थिक अवस्था पनि सुधार भइरहेको छ ।
एक वर्षयता उनले गार्मेन्ट उद्योगलाई विस्तार गरिरहेका छन् । सुरुमा तीन वटा मेसिन थियो । अहिले बढाएर ६ वटा मेसिन पुर्याएका छन् ।
उद्योगबाट तयारी कपडा उत्पादन गरी विराटनगर इटहरी लगायतका बजारमा पठाउँछन् । आफ्नो काम सुरु गरेपछि विजय सन्तुष्ट छन् । उद्योगलाई थप विस्तार गर्ने सपना पनि देखेका छन् । ‘अहिले मसँग ६ वटा मेसिन छन्, सय वटा मेसिन राखेर काम गर्ने योजना छ,’ उनले भने,‘ रोजगारी पनि १०० जना भन्दा बढीलाई दिने चाहाना छ ।’
भिडियो हेर्नुहोस् :
