विराटनगर । विराटनगर–३ कन्चनबारी चौक उत्तर ढाटसम्म वर्षात्मा पानीको निकास थुन्ने कोशी राजमार्गको होमपाइप निकालेर नाला निर्माण गरिने भएको छ ।
कोशी राजमार्ग विस्तारका क्रममा कन्चनबारी चौक पूर्व-उत्तरको २५० मिटर नालाको विकल्पमा होमपाइप लगाइएको थियो । तर, होमपाइपले कोशी राजमार्ग अन्तर्गत विराटनगर ढाट भन्दा माथिदेखि नालामा आएको पानीको वहाव थेग्न नसक्दा बस्तीतर्फ पोखिएर डुबान हुँदै आएको छ ।
वर्षेनी वर्षात्मा विराटनगर–३ को कन्चनबारी उत्तर ढाटदेखि दक्षिण डुबानको जोखिम रहँदै आएको छ । महानगरपालिकाले समानान्तर नाला निर्माणको विकल्पका लागि चालु आर्थिक वर्षमा बजेट बिनियोजन गरेको छ । तर, समानान्तर नाला निर्माण गर्न व्यक्तिको सम्पति क्षति हुने देखिएपछि नाला निर्माणको सट्टा होमपाइप लगाएको दुरीबाट त्यसलाई हटाउने योजना अगाडी बढाएको छ ।
विराटनगर महानगरपालिका शहरी पूर्वाधार महाशाखा प्रमुख अर्जुन थापाले होमपाइप निकाल्ने विषयमा सडक डिभिजन कार्यालय विराटनगरसँग छलफल भएको जानकारी दिएका छन् । उनका अनुसार सडक डिभिजनले आफ्नो मापदण्ड अनुसारको लागत निकाल्ने र त्यसको कार्यन्वयनका लागि महानगरपालिकाको रकमबाट काम गरिने छ । त्यसबेला सडक विस्तारका क्रममा समेत पानी परेर बाढी आएपछि कन्चनबारीमा तत्काल नाला निर्माणको छिटो तरिका अपनाउने हुँदा होमपाइप लगाइएको थियो ।
त्यो होमपाइपकै कारण वर्षात्को पानीको निकासमा अवरोध हुँदै आएको छ । कोशी राजमार्ग अन्तर्गत रानी–धरान छलेन विस्तारका क्रममा ठेकेदारले आफ्नो नाफाघाटा हेरेर होमपाइप बिछ्याएका हुन् । तत्कालको समस्या समाधान गर्न होमपाइप राखिएपनि पछि निकालेर नाला बनाउने योजना रहेको थियो । तर, छलेन सडक आयोजना र ठेकेदारबीच कुरा मिलेपछि होमपाइप यथावत राखिएको थियो ।
महानगरपालिकाले समानान्तर नाला निर्माणका लागि ४० लाख रुपैँया बजेट बिनियोजन गरेको छ । त्यो बजेटले होमपाइप निकालेर नाला निर्माण गर्ने योजनाका लागि अहिले प्रक्रिया सुरु गरिएको हो । यद्यपी सडकले तत्कालै लागत निकालेर दिएन भने वर्षात अगाडी नै नाला बनाउने कार्य अवरोध हुनसक्ने देखिन्छ ।
