विराटनगर । इस्लाम धर्मावलम्बीको महान पर्व ‘‘ईद उल– फित्र’ को अवसरमा विराटनगरमा रहेका मुस्लिम समुदायहरुले पनि ईद पर्व भव्य रुपमा मनाएका छन् ।
इस्लाम धर्मवलाम्बीहरुको महान् चाड इदको अवसरमा विराटनगर–१३ स्थित इदगाहमा सोमबार विहान सामूहिक भेला भई नमाज पढेका थिए । त्यसैगरी विराटनगरको विभिन्न स्थालमा रहेका मस्जिद तथा इदगाहमा भेला भएर सामुहिक नमाज पढेर एक अर्कामा अङ्कमाल गरेर शुभकामना आदान प्रदान गरी ‘‘ईद उल– फित्र’ मनाएका छन् ।
इस्लाम धार्मिक ग्रन्थ कुरान अवतरणको सुरुवात भएको यो महिनालाई रमजान (रोजा–उपवास) लिने महिना समाप्त भएको भोलिपल्ट ईदउलफित्र मनाउने गरेका छन् ।
यो पर्वका लागि मुस्लिम समुदायले एक महिना व्रत बसेका थिए । जसलाई ‘रोजा’ भनिन्छ । एक महिनासम्म चल्ने ‘रमजान’ पर्वमा समुदाय दिनमा निराहार बस्ने गर्दछन् । हाल उर्दू क्यालेण्डरअनुसार हिजरी सम्बत् १४४७ हो । रमजान महिना नवौं महिना हो । रमजान महिनामा नै मुस्लिमहरुको सबैभन्दा ठूलो ग्रन्थ कुरान अवतरण भएको हो । दान दिनु गरिब र दीन दुःखीलाई सेवा गर्नु यो महिनाको ठूलो विशेषता मानिन्छ ।
इदलाई मुस्लिम समुदायले आपसी सद्भाव र शुभकामना आदानप्रदान गरी हर्षोल्लासका साथ मनाउने गरेका छन् । विशेष नमाज पढिसकेपछि आफूभन्दा ठूलावडाबाट आशीर्वाद लिने र आफूभन्दा सानालाई आशीर्वाद दिंदै मिष्ठान्न एवं स्वादिष्ट परिकार खाने र खुवाउने परम्परा यस पर्वमा रहेको छ । एक महिनासम्म चल्ने रमजानमा मुस्लिम धर्मालम्वीहरुले सूर्य उदाउनुभन्दा लगभग दुई घण्टाअगाडि केही खानेकुरा (सेहरी) खाई सुरु हुने रोजा सूर्यास्तपछि सकिन्छ ।
