विराटनगर । नेपालको सहकारी आन्दोलनको ऐतिहासिक महत्व र उपलब्धिहरूको स्मरण गर्दै ६८औं राष्ट्रिय सहकारी दिवस सम्पन्न भएको छ । ‘समृद्धि र न्यायका लागि सहकारी’ मूल नाराका साथ बुधबार विराटनगरमा सम्पन्न भएको हो ।
कार्यक्रममा कोशी प्रदेशका मुख्यमन्त्री हिक्मत कुमार कार्कीले सहकारी आन्दोलनले देशको आर्थिक रूपान्तरणमा महत्वपूर्ण भूमिका निर्वाह गरेको बताए । “सहकारी क्षेत्र आज नेपालको अर्थतन्त्रको एक महत्वपूर्ण खम्बा बनेको छ । यसले रोजगारी सिर्जना, गरिबी निवारण र समावेशी विकासमा महत्वपूर्ण योगदान दिइरहेको छ,’ उनले भने । मुख्यमन्त्री कार्कीले प्रदेश सरकारले सहकारी क्षेत्रलाई थप प्रभावकारी बनाउन आवश्यक नीतिगत तथा कानूनी व्यवस्था गर्ने प्रतिबद्धता व्यक्त गरे ।
राष्ट्रिय सहकारी महासंघका वरिष्ठ उपाध्यक्ष रमेश पोखरेलले सहकारी आन्दोलनको वर्तमान अवस्था र चुनौतीहरूबारे प्रकाश पारे । ‘६८ वर्षको यात्रामा नेपालको सहकारी आन्दोलनले धेरै उतारचढाव पार गरेको छ। आज सहकारी क्षेत्रमा ३५ हजारभन्दा बढी संस्थाहरू क्रियाशील छन् र करिब ७० लाख नागरिकहरू प्रत्यक्ष रूपमा आबद्ध छन्, उनले भने । उनले सहकारी सिद्धान्त र मूल्यमान्यताको अनुशरण गर्दै सहकारी संस्थाहरूलाई पारदर्शी र जवाफदेही बनाउन जोड दिए ।
कार्यक्रममा सहकारी क्षेत्रमा उल्लेखनीय योगदान पु¥याएका दुई अभियन्ताहरू माधव अत्री र विष्णु ओझालाई विशेष सम्मान प्रदान गरिएको थियो ।
समारोहमा सहकारी विज्ञ प्रा.डा. खगेन्द्र ओझाले सहकारीको आर्थिक विकासमा भूमिका विषयक कार्यपत्र प्रस्तुत गरेका थिए । उनले सहकारी क्षेत्रलाई थप व्यावसायिक र प्रतिस्पर्धी बनाउन सुझावहरू प्रस्तुत गरे । कार्यक्रममा प्रदेश सहकारी संघका अध्यक्ष सुरेन्द्र भण्डारीले सहकारी आन्दोलनले सामना गरिरहेका चुनौतीहरूबारे चर्चा गरे।
मूल समारोह समितिका संयोजक डा. डिल्ली पोखरेलले कार्यक्रमको समापन टिप्पणी गर्दै आगामी दिनमा सहकारी क्षेत्रलाई थप सुदृढ र सक्षम बनाउन सबै सरोकारवालाहरूसँग सहकार्य गर्ने प्रतिबद्धता व्यक्त गरे । दिवसको अवसरमा मोटरसाईकल ¥याली, दिप प्रज्वलन र बुधबार विहान बृहत ¥याली समेत निकालिएको थियो ।
