काठमाडौं । राष्ट्रिय स्वतन्त्र पार्टीका सांसद गणेश पराजुलीले देशभित्र तथा अन्तर्राष्ट्रिय तहमा गरिने व्यवसायलाई मर्यादित बनाउन उधारो असुली कानून बनाउन माग गरेका छन् ।
आज(आइतबार) जारी प्रतिनिधि सभा बैठकमा बोल्दै उनले उधारो व्यवसायलाई कानूनले नचिन्दा कारोबार डुबेर कयौं व्यक्तिले जीवन त्यागिरहेको भन्दै उद्यारो असुलीको कानूनको माग गरेका हुन् ।
‘देशभित्र तथा अन्तर्राष्ट्रिय तहमा गरिने व्यवसायी कारोबारलाई मर्यादित बनाउन उधारो कारोबारलाई कानूनी श्रृङखला भित्र जोड्नको लागि तत्काल उधारो असुली कानून बनाउनको लागि सरकार र सम्बन्धित मन्त्रालयलाई निर्देशनसहित ध्यानाकर्षण गराउदछु ।’उनले २०७९ माग १० गते बानेश्वरचोकमा प्रेम आचार्यले आत्मदाह गरेको घटना सुनाउँदै असुली कानुनको अभाव कारण अति साना, साना र मझौला उद्योगी व्यवसायीको पीडामा परेको बताए ।
‘उधारो व्यवसाय भित्रको श्रृङखला हो । तर यसलाई कानूनले नचिन्दा कारोबार डुबेर कयौँ प्रेम आचार्यहरु आज पनि चुपचाप जीवन त्यागिरहेका छन् । ठूला र घराना उद्योगी व्यवसायीहरुले पहँुचका कारण उद्यारो असुली गर्न सक्लान् । तर अति साना, साना र मझौला उद्योगी व्यवसायीको पीडा र उधारो असुलीका बारेमा कसले बोलिदिने सरकार,’ उनले भने ।
