विराटनगर । ताप्लेजुङको फुङलिङ नगरपालिका–६ का २८ बर्षीय तेजेन्द्र लिम्वुलाई खुकुरी प्रहार गरी हत्या गरेको आरोपमा एकजना पक्राउ परेका छन् । पक्राउ परेका आरोपित ३२ बर्षीय अर्जुन गुरुङ हुन् ।
घटना गत जेठ २१ गतेको हो । फक्क्तालुङ गाउँपालिका–३ स्थित फुपु योगमाया लिम्बुको घरमा पाहुना गएका गुरुङ र उनको श्रीमती सरिता लिम्बुबीच राती पौने १ बजे सामान्य बिवादको क्रममा झगडा भएको थियो । फुपुले सम्झाई बुझाई गरेपछि दुबै जनालाई छिमेकी २८ बर्षीय तेजेन्द्र लिम्बुको साथ लगाएर उनीहरुकै घर पठाएकी थिइन् ।
फुपुले साथी बनाएर पठाएका उनै लिम्बुलाई गुरुङले बाटोमै धारिलो हतियार खुकुरी प्रहार गर्दा घटनास्थलमै मृत्यु भएको थियो । घटना पश्चात फरार रहेका गुरुङलाई तत्काल जिल्ला प्रहरी कार्यालय ताप्लेजुङबाट खटिएको प्रहरी टोलीले फुङ्लिङ–९ स्थित भिरकुना जंगलमा भाग्दै गरेको अवस्थामा पक्राउ गरेको हो ।
गुरुङले आफ्नै श्रीमतीलाई बाटोमा कुटपिट गर्लान् भन्ने संभावित घटना आंकलन गरेर लिम्बुको साथ लगाएर पठाइएको थियो । तर, बाटोमा पुग्दा गुरुङले साथ लगाएर पठाएका व्यक्तिकै खुकुरी प्रहार गरेर हत्या गरेको प्रारम्भिक अनुसन्धानमा खुलेको छ ।
