विराटनगर असोज २४,
मोरङमा ऐलानी जग्गा हडप्ने उद्देश्यले फर्जी श्रेस्ता तयार गरिएको अभियोगमा अदालतले चार जनाको पक्राउ अनुमति दिएको छ। रंगेली मालपोत कार्यालयका तीन कर्मचारी र एक व्यक्तिमाथि अदालतले पक्राउ पूर्जी जारी गरेको हो।
मोरङ जिल्ला अदालतका सूचना अधिकारी हेमबहादुर बुढाथोकीका अनुसार, पक्राउ अनुमति पाउनेहरूमा सुरक्षा गार्ड कामदेव मण्डल, नायव सुब्बा रेवति अधिकारी, कम्प्युटर अपरेटर अर्जुन न्यौपाने र जग्गा हडप्ने प्रयासमा संलग्न भनिएका भीमप्रसाद सिंह छन्।
पीडितहरूले बुधबार इलाका प्रहरी कार्यालय रंगेलीमा लिखित सम्बन्धी कसुरमा किटानी जाहेरी दर्ता गरेपछि प्रहरीले उनीहरूको पक्राउ अनुमति मागेको थियो। त्यसपछि अदालतले सो माग स्वीकृत गर्दै पक्राउ पूर्जी जारी गरेको हो।
अदालतको आदेशपछि इलाका प्रहरी कार्यालय रंगेलीले अब उनीहरूको खोजी र पक्राउ प्रक्रिया तीव्र पारेको छ। प्रहरीले उनीहरूलाई कुनै पनि बेला नियन्त्रणमा लिएर विस्तृत अनुसन्धान अघि बढाउने तयारी गरेको जनाएको छ।
