मोरङ । नयाँ मतदाता दर्ताका लागि निर्वाचन आयोगले गरेको दोस्रो चरणको अन्तिम आह्वान शुक्रबार सकिएको छ। प्रदेश निर्वाचन कार्यालय मोरङका अनुसार असोज १० गतेदेखि सुरु भएको दर्ता अभियानको अन्तिम दिन मंसिर ५ गते साँझ ४ बजे सम्म जिल्ला कार्यालयमा कुल १६ हजार ४१३ जना नयाँ मतदाताले नामावलीमा आफ्नो नाम दर्ता गराएका छन्।
सूचना अधिकारी तीर्थराज अधिकारीका अनुसार दर्ता गराउनेमध्ये महिला ७ हजार ७१६ र पुरुष ८ हजार ६९६ जना रहेका छन् ।अन्य एकजना रहेका छन् । दुवै समूहको सक्रिय सहभागिताबाट यसपटक मतदाता दर्तामा उल्लेख्य उत्साह देखिएको उनले बताए। यससँगै अनलाइन प्रणालीमार्फत कात्तिक ३० गतेदेखि मंसिर ५ गते शुक्रबारसम्म २७ हजार ९८९ जनाले मतदाता नामावलीमा दर्ता गरेका छन्। एक जिल्लाबाट अर्को जिल्लामा नाम सार्नका लागि २ हजार ८६२ जनाले निवेदन दिएका छन् भने ५५१ जनाले नामावली सच्याउन अनुरोध गरेका छन्। तर, दर्ता भएकामध्ये सबै मतदाता चाँहि हैनन् । कारण नामावलीमा दर्ता हुन १६ वर्ष उमेरमा गरेपनि मतदान अधिकार १८ वर्षमा मात्रै रहेको छ ।
अधिकारीका अनुसार गत चुनावको तुलनामा यो पटक विशेषगरी जेन्जि उमेर समूहका युवाहरूको उल्लेखनीय सक्रियता देखिएको छ । दर्ता समय सकिएसँगै अब दर्ता भएका सबै विवरण रुजु गर्ने कार्य सुरु हुने जनाइएको छ। यससँगै केन्द्रबाट प्राप्त कार्यतालिका अनुसार आगामी चरणका कामहरू अघि बढाइने पनि निर्वाचन कार्यालयले जनाएको छ।
