काठमाडौं। पूर्वप्रधानमन्त्री तथा नेपाली कम्युनिष्ट पार्टीका वरिष्ठ नेता झलनाथ खनालले भेनेजुएलामाथि अमेरिकाले गरेको आक्रमणको कडा निन्दा र भत्र्सना गरेका छन्।
उनले उक्त घटनालाई स्वतन्त्र राष्ट्रको सार्वभौमिकतामाथिको ठाडो उल्लङ्घन, अन्तर्राष्ट्रिय कानुनको खिल्ली र राज्य आतंकवादको उदाहरण भएको बताएका छन्। जारी वक्तव्यमा खनालले अमेरिकी ट्रम्प प्रशासनअन्तर्गत डेल्टा फोर्सद्वारा करिब १५० लडाकु विमान प्रयोग गरी भेनेजुएलामाथि गरिएको आक्रमणमा सर्वसाधारण र सैनिकको ज्यान गएको, सैनिक संरचना ध्वस्त पारिएको तथा निर्वाचित राष्ट्रपति निकोलास मादुरो र प्रथम महिला सिलिया फ्लोरेसलाई जबरजस्ती अपहरण गरी अमेरिका लगिएको आरोप लगाएका छन्। खनालका अनुसार भेनेजुएलामाथिको अमेरिकी हस्तक्षेपको मुख्य कारण देशमा रहेको विश्वकै ठूलो तेल भण्डार हो। उनले तेल स्रोत कब्जा गर्ने अमेरिकी स्वार्थका अगाडि मादुरो सरकार बाधक बनेपछि ‘ड्रग ट्राफिकिङ’ को झुटो बहाना बनाएर आक्रमण र अपहरण गरिएको दाबी गरेका छन्।
‘यो केवल प्रभुत्ववादी दादागिरी मात्र होइन, अमेरिकी राज्य आतंकवाद हो,’ खनालले उल्लेख गरेका छन्। उनले भेनेजुएलाका जनता साम्राज्यवादी आक्रमणविरुद्ध दृढ रूपमा उभिएको र विश्वका न्यायप्रेमी राष्ट्र, जनता तथा संयुक्त राष्ट्रसंघसमेत उक्त आक्रमणको विरोधमा रहेको उल्लेख गरेका छन्। अमेरिकाभित्रै पनि न्यायप्रेमी जनता सडक आन्दोलनमा उत्रिएको खनालको भनाइ छ। पूर्वप्रधानमन्त्री खनालले नेपाली कम्युनिष्ट पार्टी र सम्पूर्ण नेपाली जनताको तर्फबाट अमेरिकी आक्रमणको पुनः घोर निन्दा गर्दै भेनेजुएलाका जनताको प्रतिरोधप्रति ऐक्यबद्धता प्रकट गरेका छन्। साथै उनले राष्ट्रपति मादुरो र प्रथम महिलाको सकुशल रिहाइको माग गर्दै संयुक्त राष्ट्रसंघ र अन्तर्राष्ट्रिय समुदायलाई यस प्रकारका हिंसक आक्रमणविरुद्ध कडा कानुनी कारबाही गर्न आग्रह गरेका छन्।
साना र कमजोर राष्ट्रको स्वतन्त्रता, सार्वभौमसत्ता र विश्व शान्तिको रक्षा गर्न विश्व समुदाय एकताबद्ध भएर अघि बढ्नुपर्नेमा खनालले जोड दिएका छन्।
