विराटनगर मोरङ प्रहरीले नेपालबाट भारततर्फ अवैध रूपमा ओसारपसार गर्न लागिएका चार वटा गोरु नियन्त्रणमा लिएको छ।
जिल्ला प्रहरी कार्यालय मोरङका अनुसार धनपालथान गाउँपालिका–७ हरकपुर क्षेत्रमा दुई जना व्यक्तिले चार वटा गोरु भारततर्फ लैजाँदै गरेको सूचनाका आधारमा गडेरिया प्रहरी चौकीबाट खटिएको टोलीले निगरानी गरेको थियो। प्रहरी टोलीलाई देख्नेबित्तिकै ती व्यक्तिहरू गोरु घटनास्थलमै छाडेर भारततर्फ फरार भएका थिए। प्रहरीले चारै वटा गोरु सुरक्षित रूपमा नियन्त्रणमा लिएर गडेरिया प्रहरी चौकीमा राखेको जनाएको छ। फरार भएका व्यक्तिहरूको खोजी तथा पहिचानको काम जारी रहेको प्रहरीले जनाएको छ। घटनासम्बन्धी थप अनुसन्धान भइरहेको जिल्ला प्रहरी कार्यालय मोरङले जानकारी दिएको छ।
