नेपालगञ्ज । बाँकेका सहायक प्रमुख जिल्ला अधिकारी महेशकुमार गुरुङ नेतृत्वकाे अनुगमन टाेलीले नेपालगञ्जकाे सदरलाइनमा रहेकाे शंकर दयाल बद्रीप्रसाद प्राेभिजन स्टाेरलाई ग्यास लुकाएकाे आराेपमा ५० हजार जरिवाना गरेकाे छ।
ग्यास लुकाएकाे सूचना पाएपछि गएकाे टाेलीले सटर खाेलेर हेर्दा १३ वटा सिलिन्डर फेला पारेकाे थियाे। अनुगमन टाेलीले कालोबजारीका लागि लुकाएर राखेकाे भनिरहँदा स्टाेर सञ्चालकले वितरण गर्न राखेकाे बताएका थिए।
वाणिज्य, आपूर्ति तथा उपभोक्ता संरक्षण कार्यालयले उपभोक्ता संरक्षण ऐन २०७५ काे दफा ३८ काे खण्ड (क) बमाेजिम कसुर गरेकाले उक्त स्टारलाई साेही ऐनकाे दफा ३९ काे उपदफा (१) काे खण्ड (घ) बमाेजिम ५० हजार जरिवाना गरेकाे जनाएकाे छ।
कार्यालयले ७ दिनभित्र जरिवाना रकम कार्यालयकाे खातामा बुझाएर भाैचर लिएर उपस्थित हुन निर्देशन गरेकाे छ। स्टाेर सञ्चालकले जरिवाना पत्र बुझ्न मानेनन्। अहिले बजारमा खाना पकाउने ग्यासकाे अभाव देखिएको छ।
