चितवन। रसुवाको भोटेकोशीमा आएको भीषण बाढीले बगाएर बेपत्ता भएकामध्ये १३० जनाको शव चितवनमा फेला परेको छ। जिल्ला प्रहरी कार्यालय चितवनका प्रहरी उपरीक्षक रामेश्वर पौडेलका अनुसार फेला परेका शव अहिले भरतपुरमा संकलन गर्ने काम भइरहेको छ।
त्रिशूली र नारायणी नदीका किनारमा ती शव फेला परेका हुन्। फिस्लिङदेखि मेघौलीको गोलाघाटसम्मको क्षेत्रमा शव भेटिएको प्रहरी उपरीक्षक पौडेलले जानकारी दिनुभयो।
फेला परेका शवको व्यवस्थापन र पहिचानका लागि चितवनमा शव पहिचान कक्ष स्थापना गरिएको छ। भरतपुरमा रहेको औद्योगिक विकास प्रतिष्ठानको भवनमा उक्त कक्ष स्थापना गरिएको हो।
चितवनमा लगातार शव फेला पर्न थालेपछि पहिचानमा सहजता होस् भन्ने उद्देश्यले शव पहिचान कक्ष स्थापना गरिएको प्रहरी उपरीक्षक पौडेलले बताउनुभयो। शव संकलन भएपछि सनाखतको काम पनि सुरु गरिने उहाँले जानकारी दिनुभयो।
