विराटनगर । विराटनगर–६, मोरङस्थित ग्रीनपिस एकेडेमीका विद्यार्थीले प्रदेशस्तरीय हस्तलेखन तथा चित्रकला प्रतियोगितामा उत्कृष्ट सफलता हासिल गरेका छन्। राष्ट्रिय निजी तथा आवासीय विद्यालय एसोसिएसन नेपाल (नेशनल प्याब्सन) कोशी प्रदेशद्वारा आयोजित प्रतियोगितामा विद्यालयका दुई विद्यार्थीले फरक–फरक विधामा उत्कृष्ट स्थान हासिल गरेका हुन्।
प्रतियोगिताको सिनियर तह हस्तलेखनतर्फ कक्षा ८ की आदिबा खान द्वितीय भएकी छन्। त्यस्तै, जुनियर तह चित्रकलातर्फ कक्षा ५ की अनाबिया इराम प्रथम हुन सफल भएकी छन्।
कोशी प्रदेशका विभिन्न विद्यालयबाट सहभागी विद्यार्थीबीच भएको प्रतिस्पर्धामा ग्रीनपिस एकेडेमीका विद्यार्थीले हासिल गरेको सफलताले विद्यालयको शैक्षिक गतिविधिसँगै सिर्जनात्मक तथा अतिरिक्त प्रतिभा विकासमा रहेको सक्रियतालाई समेत उजागर गरेको छ।
विद्यालयले नियमित अध्ययनसँगै विद्यार्थीको रुचि, क्षमता र प्रतिभाअनुसार विभिन्न अतिरिक्त तथा सिर्जनात्मक गतिविधिमा सहभागी गराउँदै आएको जनाएको छ। यस्ता प्रतियोगिताले विद्यार्थीमा आत्मविश्वास, सिर्जनशीलता, अनुशासन तथा स्वस्थ प्रतिस्पर्धात्मक भावनाको विकास गर्न महत्वपूर्ण भूमिका खेल्ने विद्यालयको विश्वास छ।
विद्यालय परिवारले प्रदेशस्तरीय प्रतियोगितामा उत्कृष्ट स्थान हासिल गर्ने आदिबा खान र अनाबिया इरामलाई बधाई दिँदै आगामी दिनमा अझ उत्कृष्ट प्रदर्शनका लागि शुभकामना व्यक्त गरेको छ।
प्रदेशस्तरीय प्रतियोगितामा प्राप्त उपलब्धिले ग्रीनपिस एकेडेमीको सिर्जनात्मक क्षेत्रमा समेत प्रभावशाली उपस्थिति देखाएको छ। विद्यालयले आगामी दिनमा पनि विद्यार्थीभित्र रहेका प्रतिभाको पहिचान, प्रोत्साहन र विकासका लागि विभिन्न शैक्षिक तथा अतिरिक्त क्रियाकलापलाई निरन्तरता दिने जनाएको छ।
