विराटनगर । सुनसरी चतराधामका सिद्धबाबा भनेर चिनिने कृष्णदासजी महाराजविरुद्ध बलात्कारको आरोपमा अनुसन्धान अघि बढाउन दोस्रो पटक आईसियु कक्षबाट नै म्याद थपका लागिएको छ ।
उनी विरुद्ध सुनसरी जिल्ला अदालतबाट दोस्रो पटक म्याद थप गर्न प्रहरीले शुक्रबार विहान ११ बजे आईसीयु कक्षबाट नै लगेको हो ।
विराट मेडिकल कलेज तथा शिक्षण अस्पतालको को १ च ४०७३ नम्बरको एम्बुलेन्समा राखेर उनलाई सुनसरी प्रहरीले स्कटिङ गरेर सुनसरीतर्फ लगेको हो ।
कृष्णदासजीलाई लिन सुनसरीका डीएसपी विनोद शर्मा आफै टोली लिएर विराटनगर आएका थिए । मंसिर १६ गते सोमबार उनी विरुद्ध अनुसन्धान गर्न अदालतबाट पहिलो पटक चार दिनको म्याद थप गरिएको थियो ।
पहिलो म्यादको समयसीमा सकिएपछि थप अनुसन्धानका लागि दोस्रो पटक म्याद थप गर्न लैजानु परेको डीएसपी शर्माले बताए । सुनसरीको चतरा धामस्थित आफ्नो आश्रममा लगेर कात्तिक पहिलो साता बलात्कार गरेको भन्दै एक महिला अनुयायीले उनी विरुद्ध प्रहरीमा उजुरी दिएकी थिइन्
। 
त्यसपछि मंसिर १२ गते बिहीबारबाट कृष्णदासजी अस्पताल भर्ना भएका थिए । उपचाररत अवस्थामै अनुसन्धान गर्न भन्दै उनलाई पक्राउ गरेर प्रहरीले गत सोमबार म्याद थपका लागि सुनसरी अदालतमा उपस्थित गराएको थियो । 
अदालतले कृष्णदासजी विरुद्ध चार दिनको म्याद थप गर्दै उपचारका लागि अस्पतालमै भर्ना गर्न र अनुसन्धान अधिकृत तथा सरकारी वकिललाई अस्पतालमै उनीसँग बयान लिन पनि आदेश दिएको थियो । उनी अस्पतालको आईसीयूमा भर्ना थिए । डीएसपी शर्माले बयान लिन अस्पतालको आईसीयूमै पुगे पनि बिरामी रहेको भन्दै कृष्णदासजीले बोल्न अस्वीकार गरेको जानकारी दिए ।
