रबिन्द्र बराल
रंगेली । मोरङको रंगेली नगरपालिकाले कोरोना संक्रमित पुष्टि भएका नागरिकलाई राख्नका लागि गत साउन २४ गते सञ्चालनमा ल्याएको आईसोलेशन खाली भएको छ । संक्रमितको संख्या ह्वात्तै बढेपछि स्थानीय जनता क्याम्पसलाई आईसोलेशन अस्पतालमा परिणत गरिएको थियो ।
मुख्य बजार क्षेत्रमा पर्ने रंगेली–७ मा २२ सहित ३० जना संक्रमित फेला परेपछि रंगेलीले आईसोलेशन बनाउने निर्णय गरेको थियो । देशभरका शैक्षिक संस्थाहरु खाली गर्नुपर्ने चर्चा चलिरहेको बेला रंगेली नगरपालिकाले क्याम्पसलाई आईसोलेशनमा रुपान्तरण गरेको थियो । त्यस अगाडी क्वारेन्टीन रहेको जनता क्याम्पस खाली भईसकेको थियो ।
शनिबारदेखि जनता क्याम्पसको आईसोलेशन खाली भएको स्वास्थ्य शाखा प्रमुख भुपेन्द्र मण्डलले जानकारी दिनुभयो । गत १७ गते ३ जना संक्रमितको स्वाब संकलन गरेर परीक्षण गरिएको थियो । उनीहरुको कोरोना संक्रमण नेगेटिभ आएपछि आईसोलेशन शनिबारदेखि खाली भएको छ ।
जनता क्याम्पसमा एक सय शैयाको आईसोलेशन बनाइएको थियो । हालसम्म रंगेलीमा १२२ जना नागरिकमा कोरोना संक्रमण पुष्टि भएकोमा शनिबार दिउँसोसम्म सबै उपचारपछि घर फर्किसकेका हुन् ।
