विराटनगर । तीव्र गतिमा रहेको मोटरसाइकलले ठक्कर दिँदा विराटनगर महानगरपालिका–१३ की ४० वर्षीया मीरा ठाकुरको मृत्यु भएको छ । को ७ प ५३३१ नम्बरको मोटरसाइकलले ठक्कर दिँदा घाइते भएकी ठाकुरको उपचारका क्रममा न्युरो अस्पतालमा आइतबार बिहान ६ बजे मृत्यु भएको हो ।
मोरङ ट्राफिक प्रमुख प्रहरी निरीक्षक राकेश पोदारले विराटनगर–१० शान्ति चोकमा तीव्र गतिमा रहेको मोटरसाइकलले महिलालाई शनिबार दिउँसो १ बजे ठक्कर दिएर घाइते बनाएको बताए । मोटरसाइकलको ठक्करबाट टाउकोमा चोट लागेर गम्भीर घाइते भएकी ठाकुरको उपचार हुँदै गर्दा मृत्यु भएको जानकारी पोदारले दिए ।
मोटरसाइकल चालक विराटनगर–८ का १९ वर्षीय जीयालाल राजवंशीलाई नियन्त्रणमा प्रहरीले घटनाको अनुसन्धान थालेको छ । प्रारम्भिक अनुसन्धानबाट मोटरसाइकल चालक राजवंशीले लाइसेन्स बिनानै मोटरसाइकल चलाउने गरेको खुलेको छ ।
