विराटनगर । कोरोना संक्रमण जोखिम न्यून हुँदै गएका स्थानीय तहहरुका विद्यालय सञ्चालनको बाटो फुकाउन प्याब्सनले सरकारसँग माग गरेको छ । निजी तथा आवासिय विद्यालयहरुको संगठन (प्साब्सन)को केन्द्रीय समितिले शिक्षामन्त्रीलाई पत्र लेख्दै देशभर एकसाथ नभएपनि संक्रमण जोखिम कम भएका स्थानीय तहको पढाई सञ्चालन गराउन माग गरेको हो ।
प्याब्सनका केन्द्रीय अध्यक्ष टिकाराम पुरीका अनुसार तीन बुँदे सुझावसहितको पत्र शिक्षा मन्त्रालयमा पठाइएको हो । जोखिम कम भएका पालिकामा विद्यालय सञ्चालन सुरु गर्नुपर्ने, कक्षा १२ को परीक्षा साउनमै गराउने गरि तालिका सार्वजानिक गर्नुपर्ने र निजी विद्यालयका शिक्षक–कर्मचारीलाई खोप लगाउने वातावरण सिर्जना गर्नुपर्ने माग गरिएको हो ।
देशैभर एकै पटक विद्यालय खोल्न सकिदैन, अध्यक्ष पुरीले भन्नुभयो–संक्रमण घट्दै गएका स्थानीय तहका विद्यालय सञ्चालन गर्दै जाने र जोखिम रहेका पालिकाहरुमा अन्य विधिबाट पढाई सुरु गर्नुपर्छ । सरकारलाई साउनदेखि नै विद्यालय सञ्चालन गर्ने, एईईको नतिजा सार्वजानिक गरेर कक्षा ११ को भर्ना लिने, कक्षा १२ को परीक्षा तालिका सार्वजानिक गर्ने र भ्याक्सिनको सर्वसुलभ उपलब्धता गराउने विषयमा ध्यानाकर्षण गराइएको हो ।
केन्द्रीय अध्यक्षले शहरी क्षेत्रमा जोखिम रहेका पालिकाहरुको हकमा भने अहिले नै विद्यालय सञ्चालन गरेर विद्यार्थीको भौतिक उपस्थिति गराउन सक्ने अवस्था नरहेको सुझाव दिनु भएको छ । विराटनगरमा अहिले नै विद्यालय खोल्नुपर्छ भन्ने पक्षमा सहमत छैन, अध्यक्ष पुरीले भन्नुभयो–जोखिम न्यूनीकरण नहुँदासम्म इन्टरनेटको पहुँच भएका क्षेत्रमा अनलाइन कक्षा नै उचित हुन्छ ।
