विराटनगर १७ भदौ । आउँदो आइतबार आयोजना हुने ४८ औं रथयात्रालाई सफल र व्यवस्थित बनाउन सुरक्षा निकायसँग छलफल भएको छ । भदौ २० गते हुने रथयात्रामा हुन सक्ने सम्भावित दुर्घटना र चोरीलाई नियन्त्रण गर्न सुरक्षा निकायसँग छलफल गरिएको रथयात्रा समारोह समतिका सचिव ओमप्रकाश निरौलाले जानकारी दिनुभयो । छलफलमा राजनीतिक दलका नेता तथा कार्यकर्ता उपस्थित थिए । कृष्णजन्माष्टमीको भोलिपल्ट आयोजना गरिने रथयात्रालाई सफल बनाउन आयोजकले तयारी तीब्र बनाएको छ । दक्षिण एसियाकै दोस्रो ठूलो मानिने रथयात्रामा नेपाल र भारतका गरी पाँच लाखको हाराहारीमा भक्तजनहरु सहभागी हुने अनुमान गरिएको छ ।
