विराटनगर । मोरङको सुनवर्षी नगरपालिका–३ स्थित एउटा मिलमा आगलागी भएको छ । आगलागीमा परेर अरुण सिंहले सञ्चालन गरेको ‘बोलबम चिउरा मिल’मा पूर्ण रूपमा क्षति पुगेको छ ।
मिलमा धान, चिउरा र पिठो कुटाउने गरिन्थ्यो । मोरङ प्रहरीका प्रवक्ता डीएसपी दीपक श्रेष्ठका अनुसार मिल सञ्चालन गरिएको ४ कोठे भवनमा शनिबार राति ९ः५० बजेतिर अचानक आगलागी भएको हो । प्रहरी, स्थानीय बासिन्दा र ६ वटा दमकलको सहयोगमा राति ११ः३० बजेतिर मात्रै आगो नियन्त्रणमा लिइएको उनले बताए ।
आगलागीको कारण खुल्न सकिरहेको छैन । विद्युत सर्ट हुँदा आगलागी भएको हुनसक्ने अनुमान प्रहरीले गरेको छ । आगलागीमा ७० लाख रूपैयाँ बराबरको क्षति भाएको डीएसपी श्रेष्ठले बताए । आगलागीमा परेर मिल सञ्चालन गरिएको दुईवटा कोठा, दुईवटा मेसिन, मिलमा रहेको धान, भुस, पिठो र चिउरा पूर्ण रूपमा नष्ट भएको प्रहरीले जनाएको छ ।
