विराटनगर । नेपाली काँग्रेस विराटनगर महानगर समितिले तीनवटा धारणाको विषयमा कार्यकर्ता बुझाउन अन्तरक्रिया कार्यक्रम आयोजना गर्ने भएको छ । आगामी फागुन २१ गते शनिबार विहान ११ः३० देखि जैन भवनमा ‘वर्तमान परिस्थितिमा नेपाली काँग्रेसको भूमिका’ विषयक अन्तरक्रिया गरिने भएको हो ।
महानगर सभापति दिपक चापागाँईले पछिल्लो विकसित राजनीतिक घटनाक्रमलाई तल्लोस्तरका कार्यकर्ता माझ बुझाउन अन्तरक्रिया कार्यक्रम राखिएको बुधबार आयोजित पत्रकार सम्मेलनमा जानकारी दिनुभयो । एमसीसी, गठबन्धन र प्रधानन्याधीशमाथि लगाइएको महाअभियोगको विषयलाई केन्द्रीयस्तरका नेतामार्फत बुझाउनका लागि कार्यक्रम आयोजना गरिने भएको हो ।
अन्तरक्रिया कार्यक्रममा काँग्रेसका महामन्त्री गगन थापा, उपसभापति धनराज गुरुङसहितका नेताहरु सहभागी हुने सभापति चापागाँईले जानकारी दिनुभयो । कतिपय विषयमा तल्लोस्तरका कार्यकर्ता अलमलमा परेका छन्, पत्रकार सम्मेलनमा सभापति चापागाँईले भन्नुभयो–एमसीसी, गठबन्धन बनेर निर्वाचनमा जाने विषय र प्रधानन्याधीशमाथिको महाअभियोगको अन्योललाई चिर्नुछ । यस पटक नेताहरुलाई विषय दिएर बोल्न लगाइने भएको छ ।
