विराटनगर । विराटनगर-७ कोशी अस्पताल परिसरबाट मोटरसाइकल चोरी गरेर रतुवामाइ पुगेका एक युवा दुर्घटनामा परेर घाइते भएका छन् ।
गत जेठ १२ गते कोसीबाट को १८ प ७४७३ नम्बरको होण्डा बाइक चोरी गरेर रतुवामाइ पुगेका युवा दुर्घटनामा परेका हुन् । विराटनगर-८ का विरेन्द्र मुखिया रतुवामाइ नगरपालिका-५ चटपटे चौकमा दुर्घटनामा परेर घाइते भएपछि उपचारका लागि अस्पताल भर्ना हुदाँ पक्राउ परेका छन् । दुर्घटनापछि उपचारका लागि गोल्डेन अस्पताल विराटनगरमा भर्ना भएका मुखियालाइ प्रहरीले जेठ १६ गते पक्राउ गरेर चोरी कसुरमा जेठ १७ पाँच दिनको म्याद थप गरेको छ । मोरङ प्रहरीका प्रवक्ता दिपक श्रेष्ठ का अनुसार दुर्घटनामा परेको व्यक्तिको मोटरसाइकल चोरी भएको लिष्टमा देखिएपछि मुखियासँग सोधपुछ गर्दा घटना स्वीकार गरेका थिए । मुखिया सवार मोटरसाइकल ट्याक्टरमा ठोकिएको थियो । उनको टाउको, अनुहारलगायतमा चोट लागेको छ ।
