विराटनगर । विराटनगर महानगरपालिका–१८ मा सोमबार राति साइकलबाट लडेर घाइते भएका एक भारतीय नागरिकको उपचारका क्रममा मृत्यु भएको छ । भारतको अररियाका ३५ वर्षीय गोपाल मण्डलको मृत्यु भएको हो ।
विराटनगर महानगरपालिका–१८ लाभाघाटमा राति ८ः१५ बजेतिर लडेर घाइते भएको हुनसक्ने अनुमान गरिएको छ । थाहा पाउनेहरुले उनलाई उपचारका लागि न्यूरो अस्पताल भर्ना गरेका थिए । उपचारका क्रममा मंगलबार बिहान २ः१५ बजेतिर मृत्यु भएको प्रहरीले जनाएको छ।
स्थानीयका अनुसार उनी सवार साइकलमा कुनै समस्या छैन । तर, उनी मात्रै भुँईमा लडिरहेको अवस्थामा फेला परेका थिए । प्रहरीले मादक पदार्थ सेवन गरेर उनी दुर्घटनामा परेको दावी गरेको छ ।
