विराटनगर । विराटनगरबाट लुटपाटमा संलग्न दुईजनालाई मोरङ प्रहरीले पक्राउ गरेको छ ।
उनीको साथबाट लुटिएको रकम समेत बरामद गरिएको प्रहरीले जनाएको छ ।
सोमबार दिउँसो विराटनगर -१२ रानीका रविकुमार साह सुडीमाथि लुटपाट गरिएको मोरङ प्रहरीका प्रवक्ता डीएसपी रन्जनकुमार दाहालले जानकारी दिए । प्रहरी हौं भन्दै दुई जनाले लुटपाट गरेको पाइएको प्रहरीले जनाएको छ ।
प्रहरीका अनुसार पक्राउ पर्ने लुटपाटमा संलग्न विराटनगर–१ पानीट्यांकीका ३८ वर्षीय दीपक तामाङ र विराटनगर–४ खारजीका ३६ वर्षीय सुनील थापा रहेका छन् ।
प्रहरीले तामाङलाई बुधबार र थापालाई बिहीबार बिहान पक्राउ गरेको हो । पिडित साहले बिमामा तिर्न र बैंकमा जम्मा गर्न आफूले लिएर आएको १२ लाख रूपैयाँ लुटपाट भएको प्रहरी समक्ष बताएका थिए ।
लुटपाट भएको रकमका बारेमा र घटनाका बारे अनुसन्धान भइरहेको प्रहरीले जनाएको छ । लुटपाटमा संलग्न तामाङ र थापा दुवै जना पूर्वप्रहरी (जागिर छोडेका) रहेको प्रारम्भिक अनुसन्धानबाट खुलेको डिएसपी दाहाले जानकारी दिए ।
