विराटनगर । विराटनगरका मनिष तिम्सिना एएफसी गोलकिपिङ ‘ए’ डिप्लोमा लाइसेन्स हासिल गर्ने पहिलो नेपाली बनेका छन् ।
नेपाली गोलकिपिङ प्रशिक्षक तिम्सिनाले मलेसियाली फुटबल एसोसिएसनले आयोजना गरेको कोर्समा लाइसेन्स हासिल गर्दै पहिलो लाइसेन्स पाउने नेपाली बनेका हुन् ।
तीन वर्षदेखि आइलिग क्लब गोकुलम केरलाको गोलकिपर प्रशिक्षक रहेका तिम्सिना कलिंगा सुपर कपका लागि टोलीसँग ओडिशामा छन् । आइ लिगमा आवद्ध हुने उनी पहिलो नेपाली प्रशिक्षक समेत हुन् ।
त्यसैगरी मनिषले सहिद स्मारक ‘ए’ डिभिजन लिगमा गत वर्ष मनाङ मर्स्याङदी क्लबको गोलकिपर प्रशिक्षकका रूपमा काम गरेका थिए । एन्फा एकेडेमी धरानका उत्पादन तिम्सिनाले खेलाडीका रुपमा थ्री स्टार, रानीपोखरी कर्नर टिम (आरसिटी), हिमालयन शेर्पा, बाँसबारी, स्वयम्मु, ब्रिगेड ब्वाइजबाट व्यवसायीक फुटबल खेलेका छन् ।
पूर्वाञ्चलबाट पाँचौ राष्ट्रिय खेलकुदमा स्वर्ण पदक जितेका तिम्सिना दश वर्षयता प्रशिक्षणमा संलग्न तिम्सिनाले नेपाली यु-१५ राष्ट्रिय टोलीको गोलकिपर प्रशिक्षकको भूमिका पनि निर्वाह गरिसकेका छन् ।
