काठमाडौं । गृहमन्त्री रमेश लेखकले नेपाली कांग्रेसका दिवंगत नेता प्रदीप गिरिलाई ज्ञानको समुन्द्र रहेको बताएका छन् ।
प्रदीप गिरि आश्रम लहानमा आयोजित दिवंगत नेता गिरिको दोस्रो स्मृति सभालाई संवोधन गर्दै मन्त्री लेखकले उक्त कुरा बताएका हुन् ।
गृहमन्त्री लेखकले प्रदीप गिरि सधै भूईँमान्छेका कुरा उठाउनुहुन्थ्यो भन्दै नेपाली कांग्रेसको दस्तावेजहरुमा “दमजम” अर्थात दलित, महिला, जनजाति र मधेसी उहाँकै बिचार अनुसार समावेश गराइएको बताए । उनले भने, ‘पछि कर्णालीको विकास भन्ने पनि उहाँकै दूरदर्शीता थपिएको हो । संविधान निर्माणमा महत्वपूर्ण भूमिका खेल्नु भएको गिरिले मधेश र मधेशीलाई समेट्न नसकेको भन्दै फरक मत राख्नुभयो र हस्ताक्षर गर्नुभएन । उहाँको हृदयले स्वीकार नगर्दा कसैको पनि डर मानेर नगल्ने प्रवृतिका हुनुहुन्थ्यो, माक्र्सवादी कम्युनिष्ट सिद्धान्तको पनि उहाँ अध्येता र विश्लेषक हुनुहुन्थ्यो ।’
कार्यक्रममा बोल्दै स्वर्गीय गिरिकी पत्नी भारती शिलवाल गिरि “पिजी” अर्थात प्रदीप गिरि बहुआयमिक प्रतिभा भएको स्मरण गरिन् । उनले भनिन्, ‘पिजी साहित्यकार, राजनीतिज्ञ, अर्थशास्त्री, राजनीतिशास्त्री, लेखक विश्लेषक सबै थिए । ’ शिलवाल गिरिले ‘पिजी’को सम्झनामा आश्रममै प्रदीप गिरि फाउण्डेशन स्थापना गरिएको र यहाँबाट कमजोर वर्गहरुको उत्थानका लागि काम गर्ने घोषणा पनि गरिन् । स्मृति सभामा नेपाली कांग्रेसका जिल्ला स्तरीय नेता तथा कार्यकर्ताहरुले प्रदीप गिरिको व्यक्तित्व र किर्तित्वमाथि प्रकाश पारेका थिए ।
