विराटनगर । थाइल्याण्डको सुफान बुरिमा हुने इन्डुरेन्स इन्टरनेशनल च्याम्पियनसिपमा सहभागी हुन विराटनगरका चार जना रोलर स्केट खेलाडीहरू प्रस्थान गरेका छन्।
सेप्टेम्बर २० देखि २२ सम्म चल्ने यस प्रतियोगितामा १३ देशका ४०० भन्दा बढी खेलाडीहरूले भाग लिने अपेक्षा गरिएको छ।
दिल्ली पब्लिक स्कुल (डिपिएस) का दुई विद्यार्थी - कक्षा ७ की आध्या शर्मा र ईशाना शर्मासहित कुनाल कामत र मन्थन गोयल प्रतियोगितामा सहभागी हुनेछन्। प्रशिक्षक सुरज कामतका अनुसार, पाँचौं खेलाडी इउरिषा पोखरेलले समयमा भिसा नपाएका कारण सहभागी हुन नसकेकी छिन्।
खेलाडीहरूका साथमा साहिल गिरी अफिसियल र सुरज कामत प्रशिक्षकको रूपमा गएका छन्। प्रस्थान अघि, डिपिएस स्कुलले एक विदाई समारोह आयोजना गरी खेलाडी तथा प्रशिक्षकहरूलाई शुभकामना दिएको थियो। मोरङ जिल्ला रोलर स्केट एशोसिएशनले यो प्रतियोगिता इन्डुरेन्स वर्ल्ड फेडेरेशनको आयोजनामा सुफान बुरि भेलोद्रोमको स्पोर्ट स्टेडियममा हुने जानकारी दिएको छ।
