विराटनगर । राष्ट्रिय स्वतन्त्र पार्टीले आज प्रधानमन्त्रीलाई एक ज्ञापनपत्र बुझाएको छ। पार्टीका मोरङ जिल्ला सह-संयोजक भरत कडेलद्वारा हस्ताक्षरित यो पत्रमा सात बुँदे माग प्रस्तुत गरिएको छ।
पार्टीले पार्टी सभापति रवि लामिछानेको गिरफ्तारीलाई राजनीतिक प्रतिशोध भन्दै उनको तत्काल रिहाइको माग गरेको छ। साथै, सहकारी ठगी र मिटरब्याजी पीडितहरूको समस्या समाधानका लागि जिल्ला प्रशासन कार्यालयमा हेल्पडेस्क स्थापना गर्न माग गरिएको छ।
पत्रमा सहकारी ठगीका आरोपी धनराज गुरुङ र ऋषिकेश पोखरेल लगायतलाई कडा कारबाही गर्न र पीडितहरूको रकम फिर्ता गराउन पनि माग गरिएको छ।
यसबाहेक, बाँसबारी र टिकापुर जग्गा प्रकरण, ललितानिवास प्रकरण, भुटानी शरणार्थी काण्ड, र २०४६ साल पछिका सबै भ्रष्टाचारजन्य अपराधहरूको निष्पक्ष छानबिन र दोषीहरूलाई कारबाहीको माग गरिएको छ।
पार्टीले यी मागहरू पूरा नभए सरकार विरोधी सघन आन्दोलन गर्ने चेतावनी दिएको छ। यो ज्ञापनपत्र प्रमुख जिल्ला अधिकारी मार्फत प्रधानमन्त्रीलाई पठाइएको छ।
