विराटनगर । युवा राष्ट्रको लागिको आयोजनामा विराटनगरमा जारी प्रथम खुल्ला राष्ट्रिय फुटबल प्रतियोगिताको फाइनलमा बेलबारी फुटबल क्लब र विराटनगर स्पोर्ट्स एकेडेमी भिड्ने भएका छन्।
विराटनगरस्थित जुटमिल मैदानमा शनिबार हुने फाइनल खेलमा १२ टोली सहभागी प्रतियोगितामा विजेताले नगद ५१ हजार र उपविजेताले २५ हजार रुपैयाँसहित ट्रफी, मेडल र प्रमाणपत्र प्राप्त गर्ने छन्।
गार्डियन माइक्रो लाइफ इन्स्योरेन्सले आयोजक समितिलाई १ लाख रुपैयाँ बराबरको बिमा प्रदान गर्ने घोषणा गरेको छ। साथै कम्पनीले प्रतियोगिताको सर्वाधिक गोलकर्तालाई ५ लाख तथा विजेता टोलीका प्रत्येक खेलाडीलाई १ लाख रुपैयाँ बराबरको बिमा गर्ने निर्णय गरेको छ।
युवा राष्ट्रको लागिका अध्यक्ष सक्रिय गौतमका अनुसार प्रतियोगिताको सर्वोत्कृष्ट खेलाडीलाई नगद २ हजार १ सय रुपैयाँ प्रदान गरिने छ। त्यसैगरी उत्कृष्ट गोलरक्षक, डिफेन्डर, मिडफिल्डर, फरवार्ड र सर्वाधिक गोलकर्तालाई जनही १ हजार ५ सय रुपैयाँ प्रदान गरिने छ।
