विराटनगर पीपलचोकस्थित लर्डबुद्ध बोर्डिङ स्कुलले ‘लर्डबुद्ध सिङ्गिङ स्टार सिजन–२ को ग्राण्डफिनाले’ सम्पन्न गरेको छ ।
विद्यार्थीमा लुकेर रहेको प्रतिभालाई प्रस्फुटन गर्ने उद्देश्यका साथ आयोजित कार्यक्रममा विभिन्न चरण पार गर्दै छनौट भएका १२ जना विद्यार्थीबीच प्रतिस्पर्धा गराइएको थियो । प्रतियोगितामा ११ जना प्रतिस्पर्धीहरुलाई पछि पार्दै कक्षा–१० की देव्यानी दासले उपाधि जितिन् ।
त्यस्तै फस्ट रनर अप कक्षा–७ की स्टेला रेग्मी बनिन् भने सेकेण्ड रनर अप कक्षा–८ की मेघा साह भइन् । लर्डबुद्ध सिङ्गिङ स्टारका उत्कृष्ट ६ जनाको निःशुल्क गीत रेकर्ड गराइदिने विद्यालयका प्रिन्सिपल सीएम श्रेष्ठले जानकारी दिए । त्यस्तै विजेतालाई वर्षभरिका लागि सम्पूर्ण शैक्षिक शुल्कमा पूर्ण छात्रवृत्ति उपलब्ध गराइने, फस्ट रनर अपलाई ७० प्रतिशत र सेकेण्ड रनर अपलाई ५० प्रतिशत छात्रवृत्ति उपलब्ध गराइने श्रेष्ठले बताए ।
कार्यक्रममा वरिष्ठ गायक रामा मण्डल, स्नातकोत्तर क्याम्पस विराटनगरका क्याम्पस प्रमुख डा. मनोज राउत, युनिभर्सल लर्डबुद्ध एकेडमीका अध्यक्ष नितिनचन्द्र गजुरेल, लर्डबुद्ध प्लस टु का प्रिन्सिपल सरोज भट्टराई, विद्यालयका प्रिन्सिपल सीएम श्रेष्ठलगायतले शुभकामना मन्तव्य व्यक्त गरेका थिए ।
