प्रबिन दाहाल
विराटनगर, चैत्र २९
विराटनगरको रानीदेखि सुनसरीको धरानसम्मको व्यापारिक लोकमार्गलाई ६ लेनको बनाउने काम रोकिएको छ । काम गरेको रकम दुई महिनादेखि नपाएको भन्दै ठेकेदारले काम रोकेको हो ।
रानी, विराटनगर, इटहरी, धरान सडक खण्ड व्यापारिक मार्ग विस्तार आयोजनाले सम्पन्न गरेको कामको करिब १५ करोड भुक्तानी नदिएकाले काम रोक्नु परेको ठेकेदार कम्पनीले जनाएको छ ।
सडक विभागले चालु आर्थिक वर्षका लागि ४० करोड रुपैयाँ निकासा गरेपनि थप रकम निकासा नगर्दा ठेकेदार कम्पनीहरुलाई पैसा भुक्तान गर्न नसकिएको आयोजनाका इन्जिनियर सुमोद पोख्रेलको भनाइ छ ।
१० अर्ब ९८ करोड रुपैयाँ लागतमा विराटनगरको रानीदेखि धरानसम्मको साविकको दुई लेन सडकलाई चौडा गरी ६ लेनको बनाउन विभिन्न कम्पनीले ठेक्का पाएका छन् ।
