राष्ट्र, राष्ट्रियता, धर्म–संस्कृति र नागरिक बचाउ महाअभियानका संयोजक दुर्गा प्रसाईं गए मध्यराति पक्राउ परेका छन् । प्रसाईँलाई भक्तपुरस्थित उनकै निवासबाट प्रहरीले पक्राउ गरेको हो ।
जिल्ला प्रहरी परिसर काठमाडौं तथा काठमाडौं उपत्यका अपराध अनुसन्धान कार्यालयको टोलीले उनलाई पक्राउ गरेको हो ।
काठमाडौं प्रहरीका अनुसार प्रसाईँलाई हिंसा भड्किने गरी अराजक गतिविधिमा अभिव्यक्ति दिएको आरोपमा पक्राउ गरिएको हो । गत चैत १५ गतेको हिंसात्मक आन्दोलनपछि पनि उनी पक्राउ परेका थिए, यद्यपि अदालतको आदेशपछि उनी हिरासतमुक्त भएका थिए ।
प्रसाईँ पक्राउ परेसँगै प्रहरीले काठमाडौं उपत्यकामा उच्च सतर्कता अपनाउन सर्कुलर गरेको छ ।
प्रसाईंका समर्थकले मंगलवार बिहानदेखि पक्राउको विरोधमा प्रदर्शन गर्न सक्ने भन्दै राति नै मातहतका युनिटमा सर्कुलर गरेको प्रहरी प्रधान कार्यालयका एक उच्च अधिकारीले जानकारी गराएका छन् ।
