विराटनगर । विराटनगरमा शनिबारदेखि सुरु भएको ३८ औँ संस्करणको विराट गोल्डकप फुटबल प्रतियोगिताको उद्घाटन खेलमा झापा – ११ सेमिफाइनलमा प्रवेश गरेको छ ।
विराटनगरको शहीद रङ्गशालामा शनिबार भएको रात्रिकालीन प्रतिस्पर्धामा झापा–११ ले आर्मीलाई २–१ गोल अन्तरले स्तब्ध पार्दै झापा समिफाईनलमा पुगेको हो । झापाको जितमा स्ट्राइकर फागुराम थारूले दुई गोल गरे । उनी खेलको प्लेयरअफ द म्याच घोषित हुँदै नगद ११ हजार रुपैयाँ पाए । उनले खेलको १० औँ र ४४ औँ मिनेटमा गोल गर्दै टोलीको जित सुनिश्चित गरे । पराजित आर्मीका तर्फबाट खेलको २३ औँ मिनेटमा नवीन लामाले एक गोल मात्रै फर्काए ।
प्रतियोगिताको उद्घाटन कोशी प्रदेशका पर्यटन, वन तथा वातावरण मन्त्री भीम पराजुलीले गरेका थिए । वैशाख ५ गतेसम्म चल्ने यस रात्रिकालीन प्रतियोगितामा नेपाल र भारतका प्रतिष्ठित क्लब गरी ८ टिमको सहभागिता छ । आजको खेल ’ए’ डिभिजन लिग विजेता चर्च ब्वाइज युनाइटेड र विभागीय टोली एपीएफ क्लबबीच हुने आयोजकले जनाएको छ ।
रात्रिकालीन खेल साँझ ६ः ३० बजे सुरु हुने आयोजकले जनाएका छन् । आजको खेल निकै रोचक हुने अपेक्षा गरिएको छ, किनकि मैदानमा एकातर्फ ‘ए’ डिभिजनको वर्तमान शक्ति चर्च ब्वाइज हुनेछ भने अर्कातर्फ विराट गोल्डकपको पूर्वविजेता एपीएफ रहनेछ ।
