विराटनगर । नेपाली राष्ट्रिय क्रिकेट टोलीका स्टार लेग स्पिनर सन्दीप लमिछाने श्रीलंकाको फ्रेन्चाइज टोली जाफ्ना किंग्स मा अनुबन्धित भएका छन्।
आगामी लङ्का प्रिमियर लिग (एलपीएल) का लागि जाफ्ना किंग्सले सन्दीपलाई आफ्नो टोलीमा समावेश गरेको हो। यससँगै सन्दीपले अर्को एक प्रतिष्ठित विदेशी फ्रेन्चाइज लिगमा खेल्ने अवसर पाएका छन्।
नेपालका लागि अन्तर्राष्ट्रिय क्रिकेटमा उत्कृष्ट प्रदर्शन गर्दै आएका सन्दीप विश्वका विभिन्न टी–२० फ्रेन्चाइज लिगमा खेलिसकेका अनुभवी खेलाडी हुन्। उनको समावेशीकरणले जाफ्ना किंग्सको स्पिन विभाग थप सशक्त हुने अपेक्षा गरिएको छ।
सन्दीपको एलपीएल सहभागिताले नेपाली क्रिकेट समर्थकमाझ उत्साह थपिएको छ। आगामी प्रतियोगितामा उनको प्रदर्शनप्रति नेपाली क्रिकेटप्रेमीहरूको विशेष चासो रहनेछ।
