प्रिय क्रिस्टियानो रोनाल्डो, म तपाईंभन्दा उमेरमा करिब एक दशकभन्दा पनि बढी कान्छो छु। संसारभर करोडौँ मानिसहरूले तपाईँलाई आफ्नो आदर्श मान्छन्, र म पनि तीमध्ये एक साधारण तर अत्यन्तै भावुक समर्थक हुँ। सानो छँदा फुटबलसँग परिचित भएपछि तपाईँलाई पत्रपत्रिका, रेडियो, टेलिभिजन र पछि मोबाइलका स्क्रिनहरूमा हेर्दै–सुन्दै हुर्किएको व्यक्ति हुँ। फुटबलप्रति मेरो प्रेम पनि निकै गहिरो छ। कुनै समय म आफैँ फुटबल खेलाडी बन्छु भन्ने अटल विश्वास र सपना बोकेको थिएँ। तर जीवनले सबैलाई आफूले चाहेको बाटो हिँड्न कहाँ दिन्छ र? विभिन्न परिस्थितिका कारण मैले सानै उमेरमा फुटबलबाट टाढिनुपर्यो। त्यससँगै मेरो खेलाडी बन्ने सपना पनि अधुरै रह्यो।
तर एउटा कुरा कहिल्यै अधुरो भएन—फुटबलप्रतिको प्रेम।
समय बित्दै गयो, जीवन बदलिँदै गयो, प्राथमिकताहरू फेरिँदै गए, तर फुटबलप्रतिको त्यो मोह कहिल्यै कम भएन। आज पनि म फुटबललाई उत्तिकै माया गर्छु, उत्तिकै उत्साहका साथ हेर्छु, र अवसर मिल्दा खेल्न पनि मन पराउँछु। मैले धेरै खेलाडीहरूलाई मन पराएको छु, धेरै क्लब र राष्ट्रिय टोलीहरूको खेल हेरेको छु। र सत्य कुरा के हो भने, यदि यो संसारमा क्रिस्टियानो रोनाल्डो नामको खेलाडी कहिल्यै जन्मिनुभएको नै नहुन्थ्यो भने पनि म फुटबललाई यत्तिकै माया गर्ने थिएँ।
तर...
फुटबलप्रतिको मेरो प्रेम र तपाईँप्रतिको मेरो सम्मान एउटै कुरा होइन। फुटबल मलाई मनपर्ने खेल हो, तर तपाईँ मेरो जीवनमा प्रेरणाको स्रोत हुनुहुन्छ।
म तपाईँलाई केवल गोल गर्ने खेलाडीका रूपमा हेर्दिनँ। म तपाईँलाई संघर्ष, अनुशासन, आत्मविश्वास, समर्पण र कहिल्यै हार नमान्ने मानसिकताको जीवित उदाहरणका रूपमा हेर्छु।
जीवनको यात्रामा धेरै पटक यस्ता क्षण आए, जब सबै कुरा सकिएको जस्तो लाग्यो। दुःख, पीडा, असफलता, निराशा, अस्वस्थता, अपूरा सपना र अनगिन्ती संघर्षहरूले मनलाई थिचिरहेका बेला मैले धेरै पटक आफूलाई हराएको महसुस गरेको छु। कहिलेकाहीँ त आफ्नै जीवनको अर्थमाथि प्रश्न उठ्ने अवस्था पनि आयो।
तर त्यस्ता कठिन क्षणहरूमा मैले बारम्बार तपाईँको यात्रा सम्झिएको छु। मेडेराको एउटा सामान्य बालकदेखि विश्व फुटबलको सर्वोच्च शिखरसम्म पुग्नुभएको तपाईँको कथा सम्झिएको छु। तपाईँले भोग्नुभएका चुनौतीहरू, आलोचनाहरू, असफलताहरू र त्यसपछि पनि कहिल्यै नझुकेको तपाईँको आत्मविश्वास सम्झिएको छु। र हरेक पटक, त्यो यात्राले मलाई फेरि उठ्न सिकाएको छ। फेरि प्रयास गर्न सिकाएको छ।
फेरि लड्न सिकाएको छ।
फेरि सपना देख्न सिकाएको छ।
सायद तपाईँलाई कहिल्यै थाहा नहोला, तर तपाईँले फुटबलको मैदानमा सिर्जना गर्नुभएको प्रभावभन्दा पनि ठूलो प्रभाव करोडौँ मानिसहरूको जीवनमा छोड्नुभएको छ। ती करोडौँमध्ये म पनि एक हुँ। मेरो जीवनका धेरै कठिन मोडहरूमा मैले आफूलाई सम्हाल्न सकेको छु भने त्यसमा तपाईँको प्रेरणादायी यात्राको पनि मौन तर महत्वपूर्ण योगदान रहेको छ। म कहिल्यै पनि तपाईँलाई कसैसँग तुलना गर्दिनँ। कसले धेरै जित्यो, कसले धेरै गोल गर्यो वा को उत्कृष्ट हो भन्ने बहसभन्दा धेरै माथि मेरो तपाईँप्रतिको सम्मान छ। किनभने मेरो लागि तपाईँ केवल एक महान फुटबलर होइन, एक महान प्रेरणा हुनुहुन्छ।
तपाईँ मुस्कुराउँदा म खुसी हुन्छु।
तपाईँ सफल हुँदा म गर्व महसुस गर्छु। तपाईँ जित्दा मलाई पनि एउटा अनौठो ऊर्जा प्राप्त हुन्छ। र तपाईँ हार्दा पनि तपाईँबाट हारलाई स्वीकार गरेर फेरि उठ्ने कला सिक्न पाइन्छ। त्यसैले आज, विश्वभरका करोडौँ समर्थकहरूमध्ये एक नेपाली समर्थकको हैसियतले म यही कामना गर्दछु— अहिले भइरहेको फिफा विश्वकपमा तपाईँ र तपाईँको टोली पोर्चुगलले उपाधि जितोस्। तपाईँको करियरको यो अध्याय पनि इतिहासकै सबैभन्दा सुन्दर अध्यायमध्ये एक बनोस्।
र परिणाम जे भए पनि, मेरो नजरमा तपाईँले धेरै पहिले नै जितिसक्नुभएको छ—केवल ट्रफीहरू होइन, संसारभरका करोडौँ मानिसहरूको मन, सम्मान र माया। धेरै सम्मान, प्रेम र शुभकामनासहित, तपाईँको एक समर्पित समर्थक........
बिरु क्षेत्री
विराटनगर, नेपाल
