विराटनगर। काठमाडौंमा अर्थमन्त्री स्वर्णिम वाग्ले सँग भएको छलफलमा विराटनगरका उद्योगीहरूले पूर्वाधार विकासलाई प्राथमिकतामा राख्न आग्रह गरेका छन्। छलफलमा उद्योगी सुयश प्याकुरेलले देशको उच्च लजिस्टिक खर्च घटाउन प्रमुख राजमार्ग र पूर्वाधार आयोजना समयमै सम्पन्न गर्नुपर्ने सुझाव दिए। उनले पूर्वाधारलाई ‘इन्फ्रा इमर्जेन्सी’ घोषणा गरेर भए पनि निर्माण कार्य तीव्र बनाउनुपर्ने बताए।
उनले केरुङ–काठमाडौं–रक्सौल रेलमार्ग तथा काकडभिट्टाबाट आउने ढुवानी रेल कनेक्टिभिटी विस्तार भए नेपालको व्यापार प्रतिस्पर्धी बन्ने र ढुवानी लागत घट्ने धारणा राखे।
अर्थमन्त्रीले देशभरका करिब २५ उत्पादनमूलक उद्योगका प्रतिनिधिलाई छलफलका लागि बोलाएका थिए। विराटनगरबाट सुयश प्याकुरेलसहित प्रदीप शारदा, अनुज पोद्दार र युक्ति गोल्छाको सहभागिता रहेको थियो।
