काठमाडौं । भोटेकोशी नदीमा ठूलो बाढी आएपछि प्रधानमन्त्री कार्यालयले उद्धार तथा राहतका लागि सबै हेलिकप्टर कम्पनीलाई तयारी अवस्थामा रहन निर्देशन दिएको छ।
प्रधानमन्त्री बालेन शाहको सचिवालयले बाढी प्रभावित क्षेत्रमा आवश्यक परे तत्काल उद्धारका लागि हेलिकप्टर परिचालन गर्न सकिने गरी कम्पनीहरूलाई तयारी अवस्थामा रहन निर्देशन दिएको जनाएको छ।
रसुवाका प्रमुख जिल्ला अधिकारी नरेन्द्र परियारका अनुसार बुधबार बिहान करिब सवा ९ बजेतिर भोटेकोशी नदीमा एक्कासि ठूलो बाढी आएको हो।
तिब्बततर्फबाट आएको बाढी रसुवाबाट नुवाकोट हुँदै धादिङ, गोरखा र चितवनतर्फ बढेको बताइएको छ। बाढीका कारण ठूलो क्षति भएको प्रारम्भिक अनुमान गरिएको छ।
बाढीले रसुवा र नुवाकोटको सीमामा रहेको बजारसमेत बगाएको जनाइएको छ। बाढीका कारण भएको क्षतिको थप विवरण संकलन भइरहेको छ भने सम्भावित जोखिमलाई मध्यनजर गर्दै स्थानीय प्रशासनले सतर्कता अपनाउन आग्रह गरेको छ।
