विराटनगर । आफैँलाई लोकतान्त्रिक पार्टीका रूपमा चिनाउँदै आएको नेपाली कांग्रेसको अधिवेशनमै विवाद र झन्डै हात हालाहालको अवस्था सिर्जना भएको छ ।
भिडियोमा देखिएको यो दृश्य मोरङको लेटाङस्थित जनसेवा सामुदायिक वनको भवनमा मंगलबार आयोजित नेपाली कांग्रेसको क्षेत्र नम्बर १ को अधिवेशनको हो ।
अधिवेशन चलिरहँदा नेपाली कांग्रेस मोरङका जिल्ला सभापति डिगबहादुर लिम्बू र क्षेत्रीय सभापतिका उम्मेदवार देवराज चाम्लिङ राईबीच भनाभन भएको हो ।
कार्यक्रममा बोल्ने पालो नआउँदै राईले माइक समातेर बोल्न थालेपछि जिल््ला सभापति लिम्बूले पोडियम छेउमा पुगेर राईलाई धकेल्दै पालो आएपछि बोल्न भन्दै रोक्न खोजेका थिए । त्यसपछि सुरु भएको विवाद चर्किँदै जाँदा दुवै पक्षबीच झन्डै हात हालाहालको अवस्था सिर्जना भएको भिडियोमा देखिन्छ । विवाद बढ्दै गएपछि उपस्थित अन्य कार्यकर्ताहरूले हस्तक्षेप गरी उनीहरूलाई छुटाएका थिए । नेपाली कांग्रेसको १५औँ महाधिवेशनअन्तर्गत अहिले वडा, पालिका, नगर र क्षेत्रीय अधिवेशनहरू भइरहेका छन् । तर, नेतृत्व चयनका क्रममा विभिन्न स्थानमा विवाद र झडपका घटनासमेत सार्वजनिक भइरहेका छन् । लोकतान्त्रिक अभ्यासबाट नेतृत्व चयन गर्नुपर्ने अधिवेशनमै देखिएका यस्ता विवादले कांग्रेसको आन्तरिक निर्वाचन प्रक्रियामाथि प्रश्न उठाएको छ ।
