लामो समय वैदेशिक रोजगारीमा बिताएर स्वदेशमै उद्यम गरिरहेका विराटनगरका रेष्टुरेन्ट व्यवसायी ५१ वर्षीय मनोज खत्रीको असामयिक निधन भएको छ। मोरङको केराबारी गाउँपालिकास्थित धारापानी जङ्गलमा शनिबार अपराह्न उहाँ मृत अवस्थामा फेला पर्नुभएको हो।
विराटनगर–३ निवासी खत्रीले छ वर्ष जर्मनी र दुई वर्ष दुबईको अनुभव सम्हालेपछि आफ्नै गृहनगर फर्किएर पिपल चोक र गोल्छा चोकमा ‘पिजफायर’ रेष्टुरेन्ट सञ्चालन गर्दै आउनुभएको थियो। स्वदेशमै केही गर्ने सोचका साथ व्यवसायमा निरन्तर लागिपरेका खत्रीको अचानक भएको निधनले स्थानीय व्यवसायी तथा शुभचिन्तकहरूलाई स्तब्ध बनाएको छ।
जिल्ला प्रहरी कार्यालय मोरङका सूचना अधिकारी एवम् प्रहरी नायब उपरीक्षक मकेन्द्रकुमार मिश्रका अनुसार घटनास्थलमा साँचोको रिङ फेला परेको छ भने घटनाको कारणबारे अनुसन्धान सुरु गरिएको छ। आफ्नै भूमिमा व्यवसाय विस्तार गरिरहेका एक उद्यमीको यस प्रकारको दुखद निधनले स्थानीय वृत्तमा गहिरो दुःख व्यक्त गरिएको छ।
