विराटनगर । कोशी प्रदेश लोक सेवा आयोगका अध्यक्ष महेन्द्रप्रसाद गुरागाईंले पदबाट राजीनामा दिएका छन् । पदको दुरुपयोग गरेको आरोप र पछिल्लो समय विवादमा तानिएपछि उनले मंगलबार पदबाट राजीनामा दिएका हुन् ।
गुरागाईंले कात्तिक १६ गतेदेखि लागू हुने गरी प्रदेश प्रमुख परशुराम खापुङसमक्ष राजीनामा बुझाएका छन् । प्रदेश प्रमुखको कार्यालयका अनुसार उनको राजीनामा स्वीकृतिको प्रक्रियामा रहेको छ ।
अध्यक्ष गुरागाईं पछिल्लो समय अतिरिक्त भत्ता बुझेको तथा अदालतको आदेशविपरीत कर्मचारी बढुवाका लागि सिफारिस गरेको विषयलाई लिएर विवादमा परेका थिए ।
आयोगको निष्पक्षतामाथि प्रश्न उठाउँदै विरोध हुन थालेपछि उनीमाथि नैतिक दबाब बढेको थियो । विवाद चर्किँदै गएपछि गुरागाईंले पदबाट राजीनामा दिएका हुन् ।
