पुस १०, २०७४
राजधानीमा जारी टिभिएस एभरेष्ट प्रिमियर लिग ईपिएल क्रिकेटमा बिराटनगर वारियर्सले आफ्नो अपराजित यात्रा जारी राखेको छ । लिग चरणको आफ्नो अन्तिम खेलमा आज काठमाडौं किङग्स एलेभेनलाई ८ रनले पराजित गर्दै बिराटनगरले लिग चरणमा शत प्रतिशत नतिजा हात पारेको हो ।
बिराटनगरले प्रस्तुत गरेको १ सय ४८ रनको चुनौती पछ्याएको काठमाडौंले निर्धारित ओभरमा ९ विकेट गुमाएर १ सय ३९ रन मात्र बनाउन सक्यो । कप्तान फरभेज महारुफले ४२ रन बनाएपनि टोलीलाई जिताउन पर्याप्त भएन । नरेश बुढाऐरले ३० सिद्धान्त लोहनीले १५ र सागर पुनले १३ रन जोडे । आयुस्मान राथले ३ तथा बसन्त रेग्मी र रामनरेश गिरीले काठमाण्डौको २–२ विकेट लिए ।
यसअघि किर्तिपुरस्थित त्रिवि क्रिकेट मैदानमा पहिले ब्याटिङ गरेको बिराटनगरले निर्धारित ओभरमा ७ विकेट गुमाई १ सय ४७ रनको मध्यम योगफल तयार पारेको थियो । उसको जितमा बाबर हायातले ६७, आयुस्मान राथले ३२ र कप्तान पारस खड्काले २६ रनको योगदान गरे ।
जारी प्रतियोगिताको एक मात्र अपराजित टोली बिराटनगर १० अंकका साथ शीर्ष स्थानमा रहदै प्ले अफमा प्रबेश गरेको छ । चौथो हारसँगै काठमाडौं भने लिग चरणबाटै बाहिरिएको छ ।
आजै हुने दोस्रो खेलमा पोखरा राईनोज र भैरहवा ग्लाडिएर्टस भीड्ने छन् । सो खेल पनि त्रिवि मैदानमै दिउँसो १ बजेपछि सुरु हुनेछ ।
स्रोतः eKantipur
