मोरङ, साउन १५ गते।
मोरङ जिल्लाको बेग्लाबेग्लै स्थानमा सोमबार भएको सवारी दुर्घटनाबाट तीन जना घाइते भएका छन्।
मोरङको पथरी-शनिश्चेर नगरपालिका २ देवीगञ्जमा पश्चिमबाट पूर्वतर्फ जादै गरेको को २८ प ८००३ नम्बरको मोटरसाइकल अनियन्त्रित भई दुर्घटना हुँदा मोटरसाइकलका चालक जिल्ला भोजपुर तिवारीभञ्ज्याङ गाउँपालिका ४ बस्ने २० वर्षीय रमेश कार्की घाइते भएका छन।
घाइते कार्कीको पथरी अस्पतालमा उपचार भईरहेको छ भने दुर्घटनाग्रस्त मोटरसाइकल इलाका प्रहरी कार्यालय पथरीमा ल्याई राखिएको छ।
यसैगरी मोरङ जहदा गाउँपालिका १ भित्री सडक खण्डमा ट्याम्पु दुर्घटना हुँदा दुई जना घाइते भएका छन।
रानीबाट भुटाहातर्फ जादै गरेको को १ ह ९७५० नम्बरको ट्याम्पु अनियन्त्रित भई दुर्घटना हुँदा ट्याम्पुमा सवार रहेका जहदा गाउँपालिका १ बस्ने सुरेश हेमरन र उनकी पत्नी सुकुर मरण्डी घाइते भएका हुन।
घाइते दम्पतीको कोशी अंचल अस्पतालमा उपचार भईरहेको छ भने ट्याम्पुसहित चालक मोरङ जहदा गाउँपालिका २ बस्ने गणेश चौधरीलाई अनुसन्धानका लागि इलाका प्रहरी कार्यालय बुधनगरको नियन्त्रणमा राखिएको छ।
यसैगरी रंगेली नगरपालिका ७ बसपार्कमा मोटरसाइकलको ठक्करबाट सुनवर्षी नगरपालिका ८ बस्ने दिलिप यादवको छोरा प्रिन्स यादव घाइते भएका छन।
प्रिन्सलाई सोमबार दिउँसो बाटो काट्ने क्रममा पश्चिमबाट पूर्वतर्फ आउँदै गरेको को ४ प ४४५३ नम्बरको मोटरसाइकलले ठक्कर दिएको इलाका प्रहरी कार्यालय रंगेलीले जनाएको छ।
घाइते बालकलाई मोटरसाइकल चालक आफैले उपचारार्थ गोल्डेन अस्पताल विराटनगर ल्याएको छ भने ठक्कर दिने मोटरसाइकल इलाका प्रहरी कार्यालय रंगेलीमा राखिएको छ ।
