काठमाडौं असोज ९ । युवा स्पिनर सन्दीप लामिछानेले टी टेन लिग खेल्ने भएका छन् । गत वर्षबाट शुरु भएको टी टेन लिगको दोस्रो संकरणमा सन्दीपले साविक विजेता केरला किंग्स्बाट खेल्न लागेका हुन् ।
सन्दीपको टालीको इयान मोर्गान (कप्तान), सोहिल तानबीर, किरण पोलार्ड, क्रिस गेल, पाउल स्टर्लिङजस्ता खेलाडी छन् । “केरला किंग्स टोलीको एउटा अंक हुन पाउँदा उत्साहित छु,” सन्दीपले ट्विट गर्दै भनेका छन्, “मलाई माया र सहयोग गर्नुहुने सबैलाई धन्यवाद । तपाईँहरुको साथ र सहयोग कायमै रहनेछ ।”
सन्दीपले यसअघि आईपीएलमा दिल्ली डियर डेभिल्स, क्यारेवियन प्रिमियर लिगमा सेन्ट किट्स एण्ड नेभिस प्यट्रियट्सबाट खेलिसकेका छन् । क्यानडामा मोन्टरियल टाइगर्सबाट ग्लोबल टी ट्वान्टी प्रतियोगिता खेलिसकेका सन्दीपले अफगानिस्तान प्रिमियर लिग पनि खेल्दैछन् ।
आठ टोली सम्मिलित प्रतियोगिता नकआउटका आधरमा हुनेछ । सन्दीपको टोली केरलाले समूह ‘ए’ मा कराचियन, पाखतुनस् र राजपुतसँग प्रतिस्पर्धा गर्नेछ । समूह ‘बी’ पंजाब लिजेन्ड्स, बेङ्गाल टाइगर्स, मराठा अरवियन र नर्दन वारियर्स रहेका छन् । युनाइटेड अरब इमिरेट्समा हुने प्रतियोगितालाई आइसिसीले गत अगष्टमा औपचारिक मान्यता दिएको थियो ।
