झापा, असोज १८
इलाका प्रहरी कार्यालय बिर्तामोडले चोरीमा संलग्न रहेको आरोपमा ७ जनालाई पक्राउ गरी बुधबार सार्वजनिक गरेको छ ।
प्रहरीले ट्रक तथा मोटरसाइकल चोरी गर्नेदेखि ‘पाकेटमार’सम्मलाई पक्राउ गरेको हो । बिर्तामोड प्रहरीले ट्रक चोरीमा संलग्न पाँचथरको फिदिम नगरपालिका–३ बस्ने १९ वर्षीय रोशन श्रेष्ठलाई पक्राउ गरेको छ । उनी एक्लैले तीनओटा ट्रक चोरेर भागेको प्रहरीले जनाएको छ ।
ना ५ ख ४९८६, ना२ख ५०८१ र मे१ख २६३८ नम्बरको ट्रक बिर्तामोडबाट चोरी भएको थियो । यी तीनओटै ट्रक बिर्तामोड–५ का विभिन्न स्थानमा पार्किङ गरेर राखिएको ठाउँबाट रातिको समयमा चोरी भएको हो ।
यस्तै, प्रहरीले मोटरसाइकल चोरी गर्ने बिर्तामोड–२ स्थित बेलडाँगीका दिवस राई, रातको समयमा विभिन्न घर तथा पसलमा छिरेर चोरी गर्ने गौरीगन्ज–५ का १९ वर्षीय ओमप्रकाश यादव र बिर्तामोड–५ का १९ वर्षीय सुरज राजवंशीलाई पक्राउ गरेको छ ।
यस्तै, बसका यात्रीबाट नगद चोरी गर्ने कन्काई–३ का २८ वर्षीय विनोदसिंह मर्डी, सिरहाको धनगढीमाई नगरपालिकाका ४० वर्षीय लोकबहादुर जर्गामगर र झापा, दमकका ४८ वर्षीय मिलन अधिकारीलाई प्रहरीले पक्रेको हो ।
