तेह्रथुम, असोज २६ । तेह्रथुमको छथर गाउँपालिकाले जनसंख्या बढाउन बसाई सरेर आउनेलाई पाँच लाख रुपैयाँसम्म अनुदान दिने भएकोे छ । गाउँपालिका क्षेत्रमा बसाइ सरेर आउनेहरुलाई उनीहरुको व्यावसायिक योजनाका आधारमा पाँच लाख रुपैयाँसम्म अनुदान उपलब्ध गराउने भएको हो ।
सेवा सुविधाको अभाव भन्दै सर्वसाधारणको बसाइ सरेर जाने क्रमलाई रोक्न गाउँपालिकाले विभिन्न कार्यक्रम बनाएको हो । पूर्वाधार निर्माण, स्रोत साधन परिचालन, खानेपानी व्यवस्थापनलगायतका योजनाका माध्यमले बसाइसराई रोक्ने नीति गाउँपालिकाले लिएको अध्यक्ष सन्तवीर लिम्बुले बताए ।
गाउँपालिकाको यो नीतिले आगामी पाँच वर्षभित्र व्यावसायिक जनसंख्या दोब्बरले वृद्धि हुने अनुमान गरिएको छ । गाउँपालिकाले आगामी चार वर्षभित्र २५ हजार जनसंख्या पुर्याउने लक्ष्य लिएको छ । गाउँपालिकाको जनसंख्या हाल १६ हजार ७५० रहेको छ ।
