विराटनगर । ‘ह्वील लक’को विरोध गर्दै विराटनगरका सिटी सफारी र अटो चालक आन्दोलित बनेका छन् । नियम उल्लंघन गर्ने अनी कार्वाही गर्दा आन्दोलन गर्ने प्रबृती अटो तथा सिटी सफारीमा देखिएको छ । तर उनीहरु ट्राफिक प्रहरीले दुख दिएको भन्न भने छाड्दैनन् ।
पार्किङ निषेध गरिएका ठाउँमा पार्किङ गरिएका सवारी साधनमा ट्राफिक प्रहरीले ‘ह्वील लक’ लगाएर ट्राफिक नियम उल्लंघनको कसूरमा न्यूनमत पाँच सय रुपैयाँसम्म जरिवाना गर्न थालेको छ । ‘ह्वील लक’ लगाएर आफूहरुलाई अन्यायमा पारिएको भन्दै महेन्द्र चोकमा अटो र सफारी तेस्र्याएरै शुक्रबार आन्दोलन गरे । जसका कारण सडक अवरुद्ध हुँदा केही बेर सवारी आवागमन प्रभावित बन्यो ।
पार्किङ निषेध गरिएको ठाउँमा पार्किङ गरेको पाइएपछि दुईवटा अटोमा ट्राफिकले ‘ह्वील लक’ लगाएको थियो । त्यसको विरोधमा आन्दोलन भएको हो । विभिन्न जनचेतनामुलक कार्यक्रममार्फत पटक–पटक सचेत गराए पनि अटेर गरेपछि कारबाही गर्दा आन्दोलन गरिएको ट्राफिक प्रहरीले जनाएको छ ।
ट्राफिकले नियमको धज्जी उडाउँदै चालकले मनोमानी गर्न पाउनु प¥यो भन्ने आशयको आन्दोलन गरेको प्रष्ट हुने दाबी गरेको छ । ‘ह्वील लक’को विरोधमा रहेको चालकहरुको एउटा समूह डेलीगेसनका लागि जिल्ला ट्राफिक प्रहरी कार्यालय मोरङमा पनि पुगेको थियो । नियमसंगत रुपमा गुनासो सुनुवाई हुने जवाफ पाएपछि त्यहाँबाट फर्किएका उनीहरुले आन्दोलन फिर्ता लिए ।
विराटनगर महानगरपालिका–१२ घर भएका चालक शम्भु देवान ट्राफिक प्रहरीले आफूहरुमाथि अन्याय गरिरहेकाले त्यसको विरोधमा आन्दोलन गर्नु परेको बताउँछन् ।
विराटनगर–१४ क गिरिजानन्द यादवले पनि कमाई खानलाई ट्राफिक प्रहरी बाधक बनेको गुनासो गरे । दिनभरी कमाएको पैसा एक पटक ‘ह्वील लक’ लगाइदियो भने ट्राफिक प्रहरीलाई बुझाउँदै ठिक्क हुने उनको भनाइ छ । 
मोरङ ट्राफिक प्रमुख प्रहरी निरीक्षक राकेशकुमार पोदारले नियम मिच्ने सवारी साधनलाई जस्तो सुकै आन्दोलन भए पनि कारबाही गरिने बताए । एक/दुई पटक सम्झाई बुझाई गरेर सचेत गराउँदा पनि नलागेमा भने कारबाही गर्ने गरिएको उनको भनाइ छ ।
