धरान, १२ असार । धरान आसपासका क्षेत्रमा हतियार देखाउँदै लुटपाटमा संलग्न तीनजनालाई प्रहरीले पक्राउ गरेको छ ।
धरान १५ का सरोज गुरुङ, भोजपुर हतुवागडीका विजय राई र भोजपुर आमचोक गाउँपालिका–११ का सुरेश राईलाई हतियार र गोली सहित प्रहरीले पक्राउ गरेको बताएको छ ।
इलाका प्रहरी कार्यालय धरानका डिएसपी ढुण्डिराज न्यौपानेका अनुसार बुधबार राति इलाका प्रहरी कार्यालय धरानबाट खटिएको प्रहरी टोलीले दुई पेस्तोल, २६ राउण्ड गोली सहित उनीहरुलाई पक्राउ गरेको हो ।
एक महनाअघि धरान उपमहानगरपालिका–५ स्थित साउनेमा गोली प्रहार गरी जीवन विकास लघु वित्त संस्थाका कर्मचारी शम्भु गच्छदारलाई गम्भीर घाइते बनाइ ४ लाख १० हजार नगद लुटेर लगेको उनीहरुमाथि आरोप छ ।
सोही घटनापछि प्रहरीले उनीहरुको खोजी गरिरहेको थियो । पक्राउ परेकाहरुको साथबाट प्रहरीले दुई थान अटोमेटिक इन्डियन पेस्तोल, २६ राउण्ड गोली र तीन थान मोबाइल बरामद गरेको बताएको छ । उनीहरुलाई बिहीबार पत्रकार सम्मेलन गरी प्रहरीले सार्वजनिक गरेको हो ।
